Ji beriya zêdetirî sê mehan, Ronahî TV ji bo buroyeke xwe li Hewlêrê veke, serdana herêmên Başûrê Kurdistanê kir û li gorî rêgezên herêmê hemû kaxez û belgeyên xwe pêşkêş kirin. Hikumeta Îraqê ev yek erê kir, lê li jêr behaneyên cuda, rêdana kar li ba Asayîşa Başûrê Kurdistanê asê maye.
Televizyona me Ronahî TV ev sê meh in zêdetir, ji bo karê xwe yê ragihandinê li Başûrê Kurdistanê bike, serî li herêmê daye û li gorî rêgez û qanûnan, hemû belge û kaxezên xwe pêşkêş kirine.
Ji destpêka Cotmeha 2020’an de, me bi rêya nûnertiya xwe ya paytexta Swêdê Stocholm, daxwaznameyeke fermî û li gorî pirensîb û qanûnên ragihandinê şand ji aliyên peywendîdar ên Hikûmeta Başûrê Kurdistanê re.
Me daxwaz kir ku buroyeke Ronahî TV li paytexta herêma Başûrê Kurdistanê Hewlêrê were vekirin da karibe bi awayekî hêsan û li gorî qanûn û pirensîbên ragihandinê kar bike.
Lê mixabin bi behaneya ku Komîteya Peywendîdar ji ber Vîrûsa Coronayê ne civiyaye, Hêzên Asayîşê li Hewlêrê ew daxwazname li cem xwe hiştiye û erêkirina ewlehî nedaye.
Ew daxwaz hîna bê bersiv maye û me tu destûr bi dest nexistiye.
Me rêdana karê ragihandinê ji desthilata Hikûmeta Iraqê wergirt û ji bo rêkarên fermî, me serî li Desteya Rewşenbîran a herêma Başûrê Kurdistanê jî da û li gorî fermîteya herêmê belgeyên pêwîst ji saziyên peywendîdar hatine xwestin.
Li ser vê bingehê, belge dema çû ber destê Asayîşê, heta niha nehatiye erêkirin û tu bersiv nehatiye dayîn.
Em weke Rêveberiya Ronahî TV dibînin ku tiştên Asayîşa Başûrê Kurdistanê der barê nepêkanîna civîna Komîteya Peywendîdar de gotiye, behane ye da ku karê Televizyona me li ser xaka Başûrê Kurdistanê qedexe bikin û xebatê xwe yê ragihandinê nemeşîne.
Em vê helwestê di cih de nabînin û dixin rêza binpêkirina mafê azadiya ragihandinê û pêkanîna fişarê li ser dezgehên ragihandinê.
Televizyona me karê xwe li gelek bajar û paytextên Ewropî û Erebî bi rêya buro an jî nûçegihanên xwe dimeşîne, lê çima desthilata Başûrê Kurdistanê rê nade ku Ronahî TV buroya xwe li herêma wan veke?
Em bang li aliyên peywendîdar ên Hikûmeta Başûrê Kurdistanê dikin ku vê helwesta xwe biguherîne, daxwaza me erê bike da ku azadiya ragihandinê li wê herêmê misoger bibe.
