Desteya Aborî û Çandiniyê ya Rêveberiya Xweser dê gelek kargeh, di nav de ya mast û penêr veke û amadekariyên destpêkirina projeyên îsal a başkirina rewşa aborî û çandiniyê dike. Hevserokê Desteya Aborî û Çandinî Selman Barûdo da zanîn ku ji girîngtirîn xebatên wan, destekdayîna qada çandiniyê ye.
Desteya Aborî û Çandiniyê ya Rêveberiya Xweser, îsal ji girîntirîn xebatên wê, destekdayîna qada çandiniyê ya herêmê ye.
Meclisa Rêveber a Rêveberiya Xweser di civîna xwe ya 18’ê Çileyê pêk hatî de, plansaziya 2021an a desteya Aborî û Çandiniyê eşkere kir.
Projeyên qada aborî ya 2021’an
Kargeha penêr û mast li herêma Dêrikê bê vekirin.
Taqîgehek navendî ji bo mirov, lawir, çandinî û xwarinê li Hesekê were vekirin.
Aş li Reqa û Tebqa û 6 firin li Şedadê, Hol, Til Hemîs, Tirbespiyê, Çilaxa û Rimêlan dê werin avakirin.
Kargehak hevîrtirş li herêma Cizîrê bê vekirin.
Selman Barûdo: Em ê îsal destek û girîngiyê bidin qada çandiniyê ye
Hevserokê Desteya Aborî û Çandinî ya Rêveberiya Xweser Selman Barûdo diyar kir ku, ew amadekariyên destpêkirina van projeyên başkirina rewşa aborî û çandiniyê dikin.
Li gorî Barûdo, ji girîngtirîn projeyên aborî ku ji aliyê desteyê ve pêk hatin; vekirina kargeha zeytê li Hesekê ku dê rojane derdora 300 ton zeyet derxîne û derfeta kar ji zêdeyî 300 kesî re peyda bike.
Herêmên Bakur û Rojhilatê Sûrî bi çandiniyê tên naskirin, bi taybet genim, pembo û gelek berhemên din ku wê dike “zembîla xwarinê” ya hemû herêmên Sûriyê.
Selman Barûdo teqez kir ku ya girîng niha pêşxistina qada çandiniyê ye, lewra plan îsal ji bo wê jî ev in:
Projeyên qada çandinî ya 2021’an
Semad û sotemenî ji cotkaran re werin pêşkêşkirin.
Sererastkirina hemû kenalên avdanê û ji bo xebatê peydakirina alavên giran.
Embarên Sirîn û yên herêma Sebah El-Xêr werin sererastkirin.
Gelek baxçeyên sergirtî li herêmên Reqa, Tebqa û Cizîrê bên avakirin.
Hevserokê Desteya Aborî û Çandiniyê teqez kir, ew xebatên xwe bidomînin û berhemên çandiniyê ji cotkaran werbigrin weke ku di salên derbasbûyî de çêbû û hêvî kir ku sala 2021an sala xêrê be.
Tê zanîn, di sala 2020an de Desteyê zêdeyî 611 hezar ton genim, 117 hezar ton ceh, 528 ton nîsk û 611 ton nok ji cotkaran wergirtin.
