Jinên Şengalî yên ku ji kampan derbasî gundê xwe bûne, anîn ziman ku ew gelekî kêfxweş in ku vegeriyane ser axa xwe û wiha gotin:”Berî fermanê jiyana gundê me xweştir bû. Lê niha em kêfxweş in ku vegeriyan ser axa xwe.”
Piştî êrişên DAÎŞ’ê yên li ser Şengalê bi hezaran kes koçber bûn û hatin kuştin, revandin, êşkecekirin.
Bi sedan Êzidî hîn jî li kampan dimînin.
Jinên Gundê Tilqesepê yê Şengalê yên ji kampan û cihên cuda vegeriyan ser axa xwe kêfxweşiya xwe anîn ziman.
Meyrem Hisen a ji Gundê Tilqesepê, li ser jiyana gund û vegera xwe nerînên xwe wiha anî ziman:
“Em îro gelek kêfxweş in ku li ser ax û warên xwe ne.Em axa xwe bixwin jî ji bo me baştir e. Şûna em li ser axa hinekî din bijîn em li ser axa xwe bin baştir e. Em niha bi vegera gund û axa xwe gelek kefxweş in. Em bi çiya û axa xwe hene. Axa me rûmeta me ye.”
Jinên Şengalî: Em kêfxweşin ku vegeriyan ser axa xwe
Gulê Mirad diyar kir ku ew gelek keyfxweşin ku carek din vegeriya ne ser axa xwe û got;
“Kêfxweşiya me ew e ku em ser axa xwe bijîn. Helbet beriya fermanê ji niha xweştir bû.
Em hemû li gel hev bûn. Hejmara mirovên gundên me ji niha zêdetir bû.
Em heta niha li kampan diman. Çi dibe bila bibe em ê li ser axa xwe bimirin lê terka axa xwe nakin.
Em gelek kêfxweş in ku li ser axa xwe dijîn. Hêviya me ew e ku hemû gelê me yê li kampan vegerin ser axa xwe.”
Jinên Şengalî: Em baweriya xwe bi ax û warê xwe tînin
Ji Gundê Tilqesepê Feyziya Ehmed jî wiha dibêje tevî fermana herî giran jî ew baweriya xwe bi ax û warê xwe tinin û wiha anî ziman;
Baweriya me bi axa me hat em careke din vegeriyan ser cîh û warên xwe.
Hikumeta Iraqê ji me û avakirina Şengalê tiştekî nake. Di fermanê de jî xwedî li me derneketin.
Îro jî ji bo avakirina Şengalê tiştekî nake. Heger şervanê azadiyê yên PKK nebûya yek jî ji me ji vê fermanê xelas nedibûn.
Îro em vegeriyan ser axa xwe û em hevîdar in ku gelê me yên li kampan jî vegerin ser cîh û warên xwe.
