PDK di bin banê hevkariyê de, Kurdên bakur radestî Tirkiyê dike

Piştî ku Wezareta Hundir a Başûrê Kurdistanê nûçeya radestkirina wî derewand, malbata Umer Bartan ê ku PDK’ê piştî 19 mehan ew radestî polîsên Tirkiyê kiribû, ji ajansa Mezopotamyayê re çîroka girtin û radestkirina wî bi par ve kir.

Partî Demokratî Kurdistan (PDK) penaberên ku ji ber zilm û zordariya faşîzma Tirkî jî direvin, radestî ya dawî dike.

Girtin, binçavkirin û sizakirina çalakvan, siyasetmedar û rojnamevanan ne bes in, êdî ji bo parastina desthilata xwe, li dijî gelê Kurd her cure hevkarî û sîxuriyê ji dewleta Tirkî ya dagirker re dike.

PDK’ê 28 Çileya 2021’ê siyasetmedarê Kurd ê ji Bakurê Kurdistanê Umer Bartan piştî girtinê bi 19 mehan, di deriyê sînorî yê Xabûr ê navçeya Slopiyê ya Şirnexê re radestî polîsên Tirk dike.

Piştî ku bûyera radestkirina Umer Bartan di çapemeniyê de teqiya, Wezîrê Karên Hundir ê Başûrê Kurdistanê da ku kirina PDK’ya xwe binixumîne, bi daxuyaniyekê diyar kir ku ev nûçe ji rastiyê dûr in.

Lê girtin û binçavkirina sizakirina bêsedem a li hundir, her wiha hevkariya leşkerî ya digel Tirkiyê, rastiya vê yekê radixe ber çavan.

Ne tenê ev, belê axaftina malbata Umer Bartan di vê derbarê de jî vê hevkarî û durûtiyê baş derdixe holê.

Birayê Umer, Bekîr Bartan ji Ajansa Nûçeyan Mezopotamyayê re axivî û li ser jiyana wî berî ku bê girtin, wiha dibêje:

“Umer Bartan sala 1992’yan li şaredariya Bedlîsê dixebitî. Wê demê bi angaşta endamtiya PKK’ê hat binçavkirin. Sala 2001’ê piştî ku cezaya wî bi dawî bû, hat berdan. Piştre ji ber karê siyasî, lêpirsîn der heqê wî de hat vekirin û cezaya girtîgehê heya 7 sal û nîvan lê hate birîn. Ji ber vê yekê, neçar ma berî bide Başûrê Kurdistanê.”

Bekîr Bartan diyar kir ku Umer 3 Tîrmeha 2019’an li Hewlêrê ji aliyê Asayîşa PDK’ê ve bêyî ti sedemê hat girtin.

Bekîr anî ziman ku ji bo hevdîtina birayê xwe, Cotmeha heman salê çû Hewlêrê, lê Asayîşê jê re got:

“Ne pêkan e tu wî bibînî û li vê derê vala raneweste”

Piştî radestkirina Umer Bartan, polîsên Tirkiyê agahiya girtinê bi malbata wî re bi par ve kir.

Umer Bartan bi rêya telefonê agahiyên girtin û radestkirinê wiha ji biyarê xwe Bekîr re vegotin:

“Ez 19 mehan li girtîgeha Hewlêrê mam. Her tim fişar û gef li min dikirin û dixwarin. Li ser min sîxurî ferz dikir.

Li girtîgehê tecrîdeke mezin a PDK’ê li ser girtiyên ku ji ber Tirkiyê reviyane, tê meşandin.

Ji ber ku min daxwaziya wan a sîxuriyê nepejirand, ez 28 Çileyê çavgirtî û destgirtî radestî Tirkiyê kirim.”

Back to top button