Navbera wezîrên karên derve yên Rûsya, Tirkiye û Qeterê de civînek pêk hat û hat ragihandin ku wan li hevkiriye ku bersiva hewldanên cudakariyê li Sûriyê bidin.
Hersê aliyên ku serdema dirêjkirina şerê li Sûriyê ne, îdia kirin ku çareseriya yekane ya aloziya Sûriyê çareseriya siyasî ya di çarçoveya hewldanên NY`yê de ye.
Rûsya û dewleta Tirk di rêzecivînên Astanayê de gelek caran bi daxuyaniyan gef li herêmên Rêveberiya Xweser a Bakur û Rojhilatê Sûriyê xwarin û ew bi navên dûrî rastiyê wek “cudakarîxwaziyê ji Sûriyê” bi nav kir.
Tevî ku nûnerên Bakur û Rojhilatê Sûriyê hertim banga yekbûna xaka Sûriyê û rêzgirtina li serweriya wê dikin û ji bo çareserkirina aloziya Sûriyê teqeziyê bi diyalogê dikin.
Piştî civîna di navbera Wezîrê Karên Derve yê Rûsyayê Sergey Lavrov, bi hempîşeyên xwe yên Qeterî Mihemed Bin Ebdulruhmen Al Sanî û yê Tirk Mevlut Çavuşoglu de, hersê wezîran civîneke çapameniyê li dar xist.
Di civînê de Lavrov ragihand ku wan li ser “bersivdayîna hewldanên cudakariyê li Sûriyê” li hev kiriye, bi wê yekê îşaret bi Rêveberiya Xweser kir.
Bi van daxuyaniyan re diyar dibe ku niyeta Rûsyayê ya çareserkirina aloziya Sûriyê wekî ku îdia dike, tune ye, berovajî wê dixwaze hikumeta heyî bihêle û projeya demokratîk ku herêmên Bakur û Rojhilatê Sûriyê tine bike.
Hersê wezîran her wiha got ku wan li ser destpêkirina şêwirên nû di navbera welatên xwe de derbarê dosyaya Sûriyê de li hev kiriye.
Tevî ku welatên wan sedema sereke ne ku aloziya Sûriyê dirêj bibe, wezîrên karên derve yên Rûsya, Tirkiye û Qeterê îdia kir ku çareseriya yekane ya aloziya Sûriyê çareseriya siyasî ya di çarçoveya hewldanên NY`yê de ye.
