Parlamenterên HDP’ê diyar kirin ku ji bo Doza Kobanê her tişt hîn ji berê de hatibû amadekirin. Parlamenteran gotin: “Ev dozeke siyasî ye ne hiqûqî ye, Desthilat dixwaze HDP’ê ji holê rake. HDP’ê nayê darizandin.”
26’ê Nîsanê yekemîn rûniştina Doza Kobanê ku Hevserokên (HDP) yên berê pê hatin tawanbarkirin pêk hat.
Şandeya dadgehê nehişt parêzerên siyasetmedarên Kurd di dozê de amade bin, ji ber vê bêhiqûqiyê wan daxwaza reda dadgerî kir.
Şandeya dadgehê jî rûniştin heta 3’yê Gulanê bi paş xist.
Tulay Hatîmogullari: Doz dozekî siyasî ye ne hiqûqî ye
Li ser mijarê Parlamentera Partiya Demokratîk a Gelan (HDP) Tulay Hatîmogullari axivî û got,
”Li vir heq û hiqûq tuneye. Doz dozekî siyasî ye û ne dozekî hiqûqî ye, em ê vî tiştî qebûl nakin û em dibêjin HDP’ê nayê darizandin.”
Gulistan Koçyîgît: Desthilat dixwaze HDP’ê bêdeng bike û ji holê rake
Parlamentera heman partiyê Gulîstan Kiliç Koçyîgît jî axivî û diyar kir ku dadger û dozger taybet hatine bijartin.
Gulîstan da zanîn ku Îqtîdar dixwaze HDP’ê bê deng bike û armanc tenê rakirina HDP’ê ji Holê ye..
Dîlan Taşdemîr: Em ê tu car bawer nekin ku dadgeh bê aliye
Parlamentera HDP’ê Dîlan Dîrayet Taşdemîr jî li ser mijarê axivî û diyar kir ku her tişt ji berê de hatî organîzekirin û got,
“Hemû detayên dozê demên borî hatine nîqaşkirin, di çarçoveya konseptê de tên meşadin.
Em dizanin ku şandeya dadgehê ji hêla kî ve hatine tayînkirin, em tu carî bawer nakin ku ev dadgeh bêalî be”.
“Wê rastî derkeve holê, HDP mafdar e”
Hevseroka Giştî ya Partiya SYKP’ê Canan Yuce jî teqez kir ku HDP mafdar e û eger îro nebe dê sibe hemû rastî derkevin holê.
Parêzera Fîgen Yuksekdag, Ezgî Gungordu jî bal kişand ser astengiyên ku derketine û got,
“Nêzî 100 hevalên me negirtin salonê.
Di serî de me bi serokê şandeya dadgehê re hevdîtin pêk anîbû û ji me re gotibûn tu astengî dê dernekeve.
Lê mixabin 100 hevalên me yên parêzer li derve man û me îtîrazên xwe kir.
Li gorî hiqûqê beyî parêzer nikarin testpîta nasnameyê bikin.
Partiya Sosyalîst li bajarê Den Haag ê Hollandayê, li ber avahiya balyozxaneya Bilind a Tirk çalakiyek li dar xist.
Ji bo balê bikişînin ser 108 siyasetmedarên di “Doza Kobanê” de têne darizandin, bi findan li ber deriyê balyozxaneyê, jimara 108 hate nivîsandin.
Partiya Sosyalîst destnîşan kir ku ew piştgiriyê didin HDP û têkoşîna demokratîk a li Tirkiyê.
Parlamenterên partiya Ewropayê piştgirî dan HDP’ê
Her wiha Parlementerên Partiya Ewropayê li Brukselê piştgirî da HDP’ê û diyar kir ku rejîma Erdogan demokrasî, hiqûq û azadiyê binpê dike.
