Şaneyeke îstixbarata hikûmeta Şamê li kirinên xwe mikur hat

Endamên şaneyeke îstixbarata hikûmeta Şamê piştî girtina ji aliyê Hêzên Antî Terorê ve, li ser gelek kirin û pêkanîna operasyonên xwe yên bo têkbirina ewlehî û aramiya herêmên Rêveberiya Xweser, mikur hatin. Berpirsê şaneyê da zanîn ku zêdeyî 50 şaneyên girêdayî îstixbarata hikûmeta Şamê li herêmê hene.

Hikûmeta Şamê jî mîna Tirkiyeya dagirker bi her awayî, nemaze bi rêya îstixbaratê hewl dide aramî û ewlehiya li herêmên Rêveberiya Xweseriya Demokratîk têk bibe.

Yekîniyên Antî Terorê yên girêdayî Hêzên Sûriya Demokratîk (QSD) şaneyeke îstixbarata hikûmeta Şamê ku ji 3 kesan pêk tê, girt.

Ehmed Meter Qesbîr: Ji min xwest ku endamên QSD’ê armanc bikim

Endamekî şaneyê Ehmed Meter Qesbîr di mikurhatinên xwe de eşkere dike ku erka wan, armanckirina şervanên QSD bû.

“Berpirsê şaneya me Ebû Yasir bû. Wî em gihandin navenda ewlehiya siyasî. Ez ji leşkeriya rejîmê reviyabûm. Min xwest xwe radestî wan bikim. Lê mercê kuştina biwêne ya endamên QSD’ê danî ber min. Ez jî bi armanca sererastkirina rewşa xwe, tev li wan bûm. Me gelek nuqte bi armanca têkbirina ewlehiya herêmên Bakur û Rojhilatê Sûrî, armanc kirin. Em ji bo têkbirina aramiya herêma Cizîr û Dêra Zorê hatibûn erkdarkirin.”

Elaa Fethî Meter: Me li gelek deveran mayîn diçandin û diteqandin

Elaa Fethî Meter jî ku berpirsê armanckirinê bû di mikuhatina xwe de dibêje:

“Ez bi Tariq berpirsê şaneyê re axivîm. Min gotê kar çi ye? Ji min re got tu û Udey dê biçin gel Usama û bi cilên leşkerî daxuyaniyekê bidin. Piştî em gihîştin, Usama daxuyanî xwend û em li dû wî bûn. Piştî wê bi demekê, Usama hat gel û got biçe cem Udey li bal wî mayînek heye. Ez digel Udey çûm, me mayîn li ser pira Cedîd Igêdat çand û teqand. Mayîn tenê deng bû. Piştre ez vegeriyam malê. Jixwe min ev kar hemberî pereyan dikir. Piştî wê bi demekê me nuqteyeke Erka Xweparastinê armanc kir. Dûv re Teriq ji min xwest ku ez biçim Hesekê.”

Berpisê şaneyê Tariq El-Teban: Me erebeyên leşkerî û stasyonên avê dikirin armanc

Berpirsê şaneya navborî her wiha li ser xerabiya ku kiriye wiha anî ziman.

“Ez sala 2019’an li gel Ewlekariya Leşkerî bûm leşker, da ku em grupan ava bikin. Em bi pereyan xir kirin. 2 berpirs hebûn. Yek ji wan emîd Mihemed El-Ciwêr bû. Erka grupa Elaa, armanckirina erebeyên leşkerî yên QSD’ê û stasyonên avê bû. Li Hesekê jî komeke me hebû erka wê nivîsandina li ser dîwaran bû. Ewlekariya Leşkerî ferman dida min, min jî ferman dida wan. Li Hesekê çek radestî me kirin. Me gelek caran li devera Bisêrayê erebyên leşkerî armanc kirin. Me wê çaxê bêtirî 10 operasyonan pêk anîn.”

Berpisê şaneyê Tariq El-Teban: Li herêmê zêdeyî 50 şaneyên girêdayî hikûmeta Şamê hene

Li gorî berpirsê şaneyê Tariq Siûd El-Teban, zêdeyî 50 şaneyên girêdayî îstixbarata hikûmeta Şamê hene û bi şev û roj li ser têkbirina projeya Rêveberiya Xweser kar dikin.

Back to top button