Şerê di navbera Îsraîl û Filistînê de di roja 5’an de hê li dar e. Artêşa Îsraîlî bi 160 balafiran, zêdeyî 150 deverên li Xezayê bombebaran kirin. Tabûrên El-Qesam jî îro armanckirina dezgeheke kîmyewî ya li Nîr Ewzê ragihand. Konseya Ewlekariyê di derbarê de, 16 Gulanê dicive.
Artêşa Îsraîlê ragihand ku li Xezayê 160 balafirên wan ên şer duh bi hev re di nava 40 xulekan de, 450 mûşek li 150 cihî xistine.
Di heman demê de, hêzên piyade û topavêja artêşê li ser dirêjahiya sînor, bi sedan top û roketên tankan avêtin Xezayê ku di encamê de, gelek avahî hatin wêrankirin.
Îsraîl: Operasyona me ya bejahî û asîmanî li ser Xezayê berdewam e
Artêşa Îsraîlê bi dîmenekî, bombebarkirin û belavbûna nêzî sînorê digel Xezayê, belge dike.
Artêşê bi daxuyaniyekê got;
“operasyona wan a asîmanî û bejahî li dijî Xezayê berewam e”
Tabûrên El-Qesam: Me dezgeha kîmyewî ya li Nîr Ewzê armanc kir
Baskê leşkerî yê tevgera Hemasê “Tabûrên El-Qesam” ragihand ku îro wan dezgeha kîmyewî ya li devera Nîr Ewzê ya li çolistana Neqebê bi dronekê armanc kir.
Tabûrên El-Qesam her wiha da zanîn ku, bajarên Îsraîlî “Esqelan, Esdûd, Bîr El-Sebi û Sidîrût” bi 50 mûşekan hatin armanckirin.
Di encama armanckirina Esqelanê de, nêzî 10 kes birîndar bûn û ji wan; yek di rewşeke metirsîdar de ye.
Artêşa Îsraîlê destnîşan kir ku “pergala wan a parastinê” ji sedî 90 mûşekên Hemasê bêbandor kirine û ji ber ketina wan mûşekan, kuştiyên Filistînî li Xezayê zêde dibin.
Tenduristiya Filistînî: Ji destpêka şer ve 109 Filistînî hatine kuştin
Wezareta Tenduristiyê ya Filistînê jî da xuyakirin ku ji destpêka şer ve, 109 Filistînî hatine kuştin û 621 jî birîndar bûne.
Li aliyekî din, digel berdewambûna bombebaranan, malbatên Filistînî ji malên xwe koç dibin.
Li bajarê Lidê jî ya ku Cihû û Ereb bi hev re lê dijîn, pevçûnên tund di navbera aliyan didomin.
Weke gelek welatan, li Fransayê Parîsê jî xwepêşander ji bo piştgiriya Filistîniyan, herikîn “qada komarê” ya li Parîsê.
Konseya Ewlekariyê 16 Gulanê rûniştineke vekirî li dar dixe
Di vê çarçoveyê de, şandera mayinde ya NY Linda Thomas ragihand ku Konseya Ewlekariyê ya Navdewletî dê 16 Gulanê li ser rewşa Filistîn û Îsraîlê, rûniştineke vekirî li dar bixe.
