Duh Di civîna Cenevrê ya Serok Rûsya Vîladîmîr Bûtîn û Serokê Amerîkayê Joe Bîden de li hevkirin derket û aliyan weke gava destpêkê di mijara vegera balyozxaneyan de li hevkirin.
Her wiha hate ragihandin ku di heman civînê de aliyan li ser mijara alîkariya mirovî ji bo Sûrî û vekirina dergehan li hevkirine.
Duh li Cenevrê Serokê Rûsyayê Vîladîmîr Bûtîn û Serokê Amerîkayê Joe Bîden hevdîtinek pêk anîn.
Hevdîtina herdû aliyan bi qasî 4 saetan dewam kir..
Têkildarî naverokê, pêşî serokê Rûsyayê civîna çapemeniyê lidar xist..
Vîladîmîr Pûtîn hevdîtina weke avakar binav kir û got:
“Weke gava pêşî ya diyarkirina niyeta baş, herdû alî biryar da ku xebatên balyozên xwe bidin destpêkirin.
Di hevdîtinê de ti helwestên dijminane derneketin pêş..”
Têkildarî sûcdariyên êrişên elektronîk de jî, serokê Rûsyayê wiha got;
“Em dixwazin ev mijar were gotûbêjkirin.
Lê divê were zanîn ku Amerîka bûye navenda herî mezin a pêkanîna êrişên elektronîk.”
Pûtîn ragihand ku têkildarî aloziya Ukraynayê bi Biden re axiviye û da zanîn ku tevlêbûna Ukrayanayê ji NATO`yê re nabe were nîqaşkirin.
Serokê Rûsyayê, her wiha anî ziman ku lazime Waşîngton ji tevgerên Rûsya ên leşkerî nekeve nava tirs û fikaran û daxuyakirin hêviya berdewamkirina diyalogê zêde bû.
Amerîka: Derfeta vekirina dergehên mirovî bi Sûriyê re heye
Her wiha Skay News jî ragihand ku di civîna duh a ya Pûtîn û Biden de mijara alîkariya mirovî û vekirina dergehan yên Sûrî jî bûye rojev.
Skay News li ser zimanê çavkaniyekî di Wezareta Derve ya Amerîka diyar kir ku Biden tekez kiriye derfet heye bi hevkariya Rûsiya dergehên mirovî bi Sûriyê re werin vekirin.
Di kanûna 2019’an de Rûsiya û Çîn bi Vîtobiryara Konseya Ewlekariyê ya ji bo vekirina dergehên sînorî bi Îraq û Tirkiyê re asteng kirin.
Ji ber wê jî deriyê Til Koçer ê di navbera herêmên Rêveberiya Xweser û Îraqê hatiye girtin.
Vê jî bandoreke mezin li rewşa jiyanî ya şêniyên Bakur û Rojhilatê Sûriyê kiriye.
Ji ber vetoya Rûsiya û Çînê, alîkarî bi riya dergehê Bab El-Selam û Bab El-Hewa yên di bin dagirkeriya dewleta Tirk û çeteyên wê re derbas dibin.
