Mirî El-Şiblî: Kampa Holê bûye bombeyek ne diyare kengî biteqe

Endamê Meclisa Serokatiyê ya MSD’ê Mirî El-Şiblî derbarê pirsgirêka bi hezaran çete û malbatên wan yên li kamp û girtîgehên li bakur û rojhilatê Sûriyê de diyar kir di serî de NY û hemû dewletên ku di nava vê meseleyê de ne ji bo çareseriyê gavan bavêjin.
Mirî El-Şiblî destnîşan kir ku bi taybetî kampa Holê weke bombeyeke li ber teqînê û xwest di vê mijarê de cîhan berpirsyariya xwe bi cih bîne.

2 sal li ser ragihandina tunekirina DAIŞ’ê li ser erdnîgariya Sûriyê, ji aliyê QSD’ê ve derbas bûn.

Tevî wê jî cîhan bi xemsarî nêzî vê mijarê dibe û pirsgirêkê çareser nake.

Endamê Meclisa Serokatiya MSD’ê Mirî El-Şiblî pêwîstî bi çareserkirina pirsgirêka DAIŞ’ê dît û got,

“Ew rêxistineke sazûmankirî ya terorîst e û li ser asta cîhanê kar dike.

Ew fikrek û îdeolojiyeke ku mêjiya beşek mezin a şêniyên Sûriyê û heta yên ne sûrî guhert.

Hemwelatiyên dewletên cîhanê bi giştî di nava wê de ne.

Ev fikrekî li ser cîhanê bi giştî metirsîdar e ji ber wê divê ev pirsgirêk were çareserkirin.”

Mirî El-Şiblî destnîşan kir ku QSD’ê hêza yekane ye ku DAIŞ tune kir û wiha li axaftina xwe zêde kir,

“Di encama tunekirina DAIŞ’ê de kampa Hol ava bû ku malbatên DAIŞ’ê tê de ne.

Ev kamp bûye bombeyek û heke cîhan bi berpirsyariya xwe ranebe, ne diyar e di kijan kêliyê de biteqe.

Heke ew kesên di vê kampê de birevin, dê li ser cîhan bi giştî bibin xeteriyek.”

Endamê Meclisa Serokatiya MSD’ê anî ziman ku ji bo çareserkirina vê pirsgirêkê divê ji zarokan de were dest pê kirin û got,

“Divê zarok ji vî fikirî xilas bibin, zarokê ku dema rizgarkirina Reqayê 5 salî bû, niha 10 salî ye.

Tu navend ji bo ji nû ve perwerdekirina van zarokan tune ye, ev erkeke ne hêsan e.”

El-Şiblî diyar kir ku divê NY û dewletên pêşketî biryareke navneteweyî bidin, van kesan ji nû ve perwerde bikin an jî hemwelatiyên xwe bibin gel xwe.

Endamê Meclisa Serokatiya MSD’ê Mirî El-Şiblî bang li aliyên navneteweyî kir û ew hişyar kirin ku bi lez û bi awayekî cidî nêzî vê mijarê bibin.

Back to top button