Ji bo pêşî li guherîna rewşa avhewa were girtin û pileya germanhiyê di bin 1,5 de were girtin, lîderên cîhanê dicivin.
Beriya civîna li Glasgowê Rêxistina Hewa ya Cîhanê texmînên xwe yên ji bo sala 2021’an weşand.
Rêxistinê got,
2021 bû yek ji heft salên herî germ ên cîhanê.
Rêxistina Rewşa Hewayê ya Cîhanê (WMO) di destpêka Konferansa Avhewayê ya Cîhanê ya li Glasgowê de texmînên xwe yên ji bo rewşa heyî parve kir.
Rêxistinê diyar kir ku îsal wê bibe yek ji heft salên herî germ ên dîroka nêz.
Îsal, bûyera hewayê ya La Nîna ku çend salan carekê rû dide destpêkê bandoreke cemidandinê kir.
Rêxistinê li gorî daneyên ku heta dawiya meha Îlonê pîva, îsal ji 1850’î heta 1900’î di ser asta 1.09 pile ya germahiya global de tê, hesibandin.
Sala herî germ a heta niha bi 1.2 pileyî sala 2016’an bû.
Piştre jî salên 2019 û 2020’an bûn salên herî germ.
Lê cudahiya navbera her sê salan ewqasî kêm e ku zehmet e mirov wan bixe rêzê.
Bandora guhertina avhewayê li gelek deveran xwe nîşan da.
Ji dema qeydkirinê ve yekemcar li cihê herî bilind ê qeşa Gronlandê li şûna berfê, baranê lê kir.
Li rojavayê DYA û Kanadayê pêla germahiya global, germahî bi şeş pileyî zêde kir.
Li Tûnis, Sîcîlya, Spanya, Tirkiye û derdora Derya Spî germahî di asta rekorê de zêde bû.
Her wiha li gelek deveran daristan şewitîn.
Li Çîn û Ewropayê -Weke ku di mînaka eyaletên Nordrhein Westfalen û Rheinland-Pfalzê hate dîtin- baraneke zêde lê kir û lehî rabû.
Li Başûrê Amerîkayê du salan li ser hev ziwatiyeke giran rû da.
Li gorî texmînan oqyanûsan heta niha ji sedî 23 emîsyonên CO2 ên ji ber mirovan mêt.
WMO’yê bal kişand ser encamên giran û wiha got:
Ziwatî û lehî dibin sedem ku çavkaniyên debarê yên bi milyonan mirovî ji holê rabin.
Hejmara mirovên ji ber birçîbûnê dimirin zêde dibe.
Bi milyonan mirov ji herêmên ku jiyan lê nepêkane koçber dike.
