Rewşa girtiyên nexweş yên Kurd ên li zîndanên dewleta Tirk roj bi roj giran dibe. Girtiyên nexweş ne tên dermankirin ne jî tên berdan. Gelek girtî têne sirgûn kirin û di hûcreyên yek kesî de jî girtî tên tecrîd kirin. Malbatên girtiyan îro jî çalakî kirin.
Li girtîgehên dewleta Tirk, zext û binpêkirinên li dijî girtiyan roj bi roj zêdetir dibin.
Girtiyên nexweş, nayên derman kirin û bi mirinê re rû bi rû têne hiştin.
Girtiyên ku cezayên wan qediyane jî nayên berdan.
Hevseroka HDP’ê a Mûş’ê Mûhlîse karaguzel ku girtî û nexweş e, krîza dil derbas kir
Hevseroka Partiya Demokratîk a Gelan (HDP) a Mûşê Mûxlîse Karaguzel ku girtiye û nexweşiyên giran pê re hene, doh krîza dil derbas kir.
Hate ragihandin ku Mûxlîse anjiyo bûye û stentek xistine dilê wê û tevî rewşa wê ya ne baş, wê dîsa vegerînin girtîgehê.
Keça Mûxlîse, Zîlan Karaguzel bertek nîşanî vê yekê da û got: divê dayika min li nexweşxaneyê bê dermankirin.
Girtiyê bi navê Salih Altûnişik yê 70 salî 30 sal in girtî ye
Girtiyê bi navê Salih Altûn-işik jî ku temenê wî 70 sale, 30 sal in girtî ye.
Di 30 salên zindanê de hema bibêje tu tişt nemaye û nehatiye serê wî û gelek nexweşî lê peyda bûne.
Dema ew di zindanê de ye, du zarokên wî ji ber nexweşiya penceşêrê jiyana xwe ji dest didin.
6 meh mane cezayê wî biqede, lê ne tê berdan ne jî tê dermankirin.
Girtî têne sirgûn kirin û di hûcreyên yek kesî de jî têne tecrîd kirin
Binpêkirinên mafan yên li dijî girtiyên siyasî û Kurd, bi van kirinan sinordar nemane..
Gelek girtî têne sirgûnkirin û di hûcreyên yek kesî de jî tên tecrîdkirin..
Hat ragihandin ku di 7’ê Adarê de 5 girtî bi awayekî kêfî ji Girtîgeha bajarê Edîrneyê sirgûnî Girtîgeha Sîncanê ya bajarê Enqerê bûne…
Piştî sirgûnê, her pênc girtî li hucreyên yek kesî hatine bi cih kirin.
Komeleya Mafên Mirovan: Saziya Tiba Edlî bûye saziyeke siyasî
Têkildarî rewşa girtiyên nexweş û binpêkirinên mafan ên li girtîgehan, Serokê Komeleya Mafên Mirovan ya Şaxa Wanê Mehmet Karataş,axivî.
Karataş diyar kir ku tecrîd li tevahiya girtîgehan belav bûye û bal kişand ser raporên Saziya Tiba Edlî ku di raporê de dibêje “dikare di girtîgehê de bimîne”
Mehmet Karataş, bertek nîşanî vê yekê de û got; Saziya Tiba Edlî bûye saziyeke siyasî.
Nobeta edaletê a malbatên girtiyan li Amedê 115 roj in dewam dike
Li aliyê din, Nobeta Edaletê ya malbatên girtiyan a li ber baroya Amedê ya bi armanca berdana girtiyên cezayê wan xelas bûyî lê nayên berdan û girtiyên nexweş, di roja 115’an de dewam kir.
Di çalakiya îro de parlamantera HDP’jî di nav de gelek rêveber û endamên rêxistinên civaka sivîl jî xwestin piştgiriyê bidin malbatan.
Polîsên ku malbat dorpêç kiribûn, nehiştin ku tu nûnerên rêxistinên civaka sivîl beşdarî çalakiyê bibin.
Li ser vê yekê, parlamenter Feleknas Uca û parêzeran li ber deriyê edliyeyê daxuyanî dan.
