Endamê Konseya Hevserokatiya PYD’ê Aldar Xelîl diyar kir ku Şoreşa Rojava şoreşeke civakî û pêdivî hê zêdetir bi rêxistinkirina civakê heye. Xelîl girîngiya pergala parastinê ya civakê jî anî ziman û got: “Ger pergala parastinê ya civakî xurt buya wê dijmin nikariba bajarên me dagir bikira.”
Endamê Desteya Hevserokatiya PYD’ê Aldar Xelîl ji ajansa nûçeyan a Firatê re derbarê şoreşa Rojava û xalên wê yên sereke de nirxandin kir…
Xelîl diyar kir ku şoreşa Rojava şoreşeke civakî ye û armanca wê ew e ku azadî, edalet û wekhevî pêk were û wiha dest bi axaftina xwe kir.
Aldar Xelîl: Rêxistinkirina civakê hîmê sereke yê şoreşê ye
” Şoreşa ku niha dimeşe şoreşeke civakî ye. Dema civak bi rêxistin bibe, wê bibe xwedî îrade û pergala xwe ava bike..
11 salin li vir şoreşekê dest pê kiriye, beriya wê jî bingeha şoreşê hebû û bingeh jî komîne.
Divê kombûn û çareserkirina pirsgirêkan li komînan be.
Ji ber ku bi sedan salan pergala dewletparêz û desthilatparêz li ser civakê serwer bû, civak ji rastiya kombûnê û komînan dûr ketiye..”
Aldar Xelîl: Aboriya civakî azadiyê û şoreşê misoger dike
Aldar Xelîl qala girîngiya aboriya civakî jî kir û ev nirxandin kirin: “Beriya çend salan hinek kesan gotin em dixwazin kooperatîfên civakî çêbikin û em dixwazin aboriya civakê geş bikin.
Lê dema ku me şopand me dît ku esasê wê ne kooperatîf in. Di esasê xwe de pergala desthilatdar çawa nêzikî aboriyê dibin, ew jî wisa nêz dibin.
Bi rêya kooperatîfan tu dikarî pêdiviyên xwe yên jiyanê pêk bînî.
Heke bi rastî jî em azadiyekê dixwazin, divê em koperatîvên civakî pêş bixin û ev bi hêza civakî pêk tê.
Aldar Xelîl: Divê hemû civak tevlî pergala parastina cewherî bibe
Xelîl derbarê pergala parastina civakê de jî balkişand ser parastina Cewherî û wiha dewam kir:
“Pergala desthilatdar civak parçe kiriye û ew bêyî parastin hiştiye.
Civakan qedera xwe teslîmî dewlet an jî artêş an kiriye.
Nabêje ez ê xwe çawa biparêzim.
Heke pergala me ya parastinê xurtbûya û me xwe baş rêxistin bikira, wê dijmin nekariya Efrîn dagir kiriba.
Heke li Serêkaniyê û Girê Spî, me pergala parastina cewherî xurt kiriba, wê dijmin biketa nava zehmetiyên mezin û vê jî wê li ser siyaseta navnetewî bandor kiriba.
Divê civak hemû xwe berpirsyar bibîne û her kes di nav pergala parastinê de cih bigire.
Aldar Xelîl: Peymana civakî tê amadekirin û wê pêşkeşî gel were kirin
Endamê Desteya Hevserokatiya PYD’ê Aldar Xelîl di dawiyê de işaret bi Peymana Civakî ku tê amadekirin jî kir û got: “Nûnerên PYD’ê jî wek partiyên din, di nav peymana civakî de cih digirin.
Em niha gihiştine pêvajoya dawiya peymanê.
Wê bi gel re were parvekirin û li gorî wê ger hewce bike, hin tişt werin guhertin..
Piştre ew ê pêşkêşî Meclîsa Giştî ya Bakur û Rojhilatê Sûriyê were kirin.”.
