Berxwedana Êzîdiyên Şengalê ku şerê jiyan û hebûnê dikin, li cîhanê deng vedide.
Lê tevî vê jî rayedar û xwediyên biryaran, li hemberî êrîşên li ser Şengalê û daxwaza wan a vegera li warê xwe, tiştekî ji bo wan nakin û tenê berjewendiyên xwe diparêzên.
Televizyona ARTE ya Almanî di bernameyeke xwe de, balê dikşîne ser berxwedan û jiyana Êzîdiyên Şengalê û paşguhkirina wan ji aliyê civaka navnetewî ve.
Televizyona ARTE ya Almanî di bernameya xwe ya bi navê Reportage de, ku behsa gelek bûyerên cîhanî yên balkêş dike, di xelekeke xwe de, bi riya Reportajekê, behsa jiyan û berxwedana Êzîdiyên Şengalê jî dike.
Di rêportaja ARTE de, behsa dorpêçkirina Şengalê ji aliyê hikûmeta Iraqê ve tê kirin ku çawa dora Şengalê bi dîwarekê nêzîkî 600 km îzole kiriye û dora wê asê kiriye.
Her wiha behsa zehmetiya derbsabûna wê herêmê jî tê kirin.
Di rêportacê de bal tê kişandin li ser zehmetiya jiyana Şengaliyên ku ji ber êrîşên DAIŞ’ê koçber bûne û bê cih û war mane û çawa ji aliyê ti kesî ve bê destek tên hiştin û nikarin vegerin warê xwe yê ku wêran bûye.
ARTE behsa dema êrîşên çeteyên DAIŞ’ê yên di sala 2014’an de jî dike û tê gotin ku çawa wê demê artêşa Iraqê û pêşmergeyan, gel di nava lepên DAIŞ de bê parastin hiştin û reviyan.
Û çawa gerîllayên PKK’ê bi hawara wan ve hatine û ew parastine û çawa îro ew leşkerên ku reviyane hewl didin careke din, Şengalê dagir bikin.
Her wiha rêportaja ARTE balê dikşîne ser berxwedan û xwebirêxistinkirina jinên Şengalê ya piştî êrîşan jî, ku çawa jinên ji DAIŞ’ê rizgar bûne, li hemberî êrîşan, di bin sîwana PKK’ê de xwe perwerde kirine û xwe û herêma xwe birêve dibin û diparêzin.
Li aliyê din bal tê kişandin ser çalakiyên li dijî artêşa Iraqê û êrîşên hewayî yên dewleta Tirk.
ARTE balê dikşîne ser paşguhkirina raya giştî ya ji bo Êzîdiyan û dibêje ku çawa êrîş zêde bûne, lê ti kes alîkarî û destekê nade civaka Êzîdî ya Şengalê.
Di dawiyê de jî behsa daxwaza Êzîdiyan a xwerêvebirinê ku ew jî sûdê ji tecrûbeya Rêveberiya Xweser a Rojava digrin, tê kirin.
