Rêveberiya Xweser a Bakur û Rojhilatê Sûriyê gefên dewleta Tirk ên êrişeke dagirkeriyê ya nû li dijî herêmê şermezar kir û teqez kir ku dê bi hemû derfetên xwe herêmê biparêzin.
Rêveberiya Xweser bang li gelên herêmê jî kir li dijî êriş û dagirkeriyê yekîtiya xwe ava bikin û têkoşîna xwe mezin bikin.
Êriş û gefên dewleta Tirk a dagirker yên li ser Bakur û Rojhilatê Sûriyê dewam dikin.
Derbarê êriş û gefên Tirkiyê de Meclisa Rêveber û Meclisa Giştî yên Rêveberiya Xweser a Bakur û Rojhilatê Sûriyê îro li Reqayê daxuyaniyek dan.
Hevserokê Meclisa Rêveber Ebid Hamid El-Mihbaş daxuyanî xwend.
Rêveberiya Xweser di destpêka daxuyaniyê de îşaret bi guhertina demografiyê û tirkkirina herêmên dagirkirî kir û got:
“Dewleta Tirk a dagirker hewl dide rewşa Sûriyê û herêmê tevlîhevtir bike.
Di daxuyaniyê de hate diyar kirin dewleta Tirk armanc dike nasnameya herêmên dîrokî yên li ser sînorên Sûriyê biguherîne û mîna li Efrîn, Serêkaniyê û Girê Spî kiriye, wan herêman ji şêniyên wê yên resen vala bike.
Rêveberiya Xweser: Êrişên Tirkiyê tenê dikeve xizmeta DAIŞ’ê
Di daxuyaniyê de li ser bandorên xeter ên êrişeke nû li dijî herêmê, hişyarî hat dayîn û hate gotin:
“Ev siyaset di mijara jenosîd, derxistina şerekî demdirêj di navbera pêkhateyên herêmê de dê bandorên xeter bi xwe re bîne.
Bê guman ev yek li ser pêşeroja wan gelan gef e.
Wê hemû rêxistinên terorîst û şaxên wê, ev herêmên ku dewleta Tirk hewl dide dagir bike wekî cihekî ewle ji xwe re bibînin.”
Rêveberiya Xweser: Dewleta Tirk peymanên navneteweyî binpê dike
Di dewama daxuyaniyê de hate destnîşankirin ku, “Dewleta Tirk peymanên navneteweyî yên têkildarî herêmê ku di navbera wê û Rûsya û Amerîkayê de hatine îmzekirin, binpê dike.
Rêveberiya Xweser di daxuyaniya xwe de îşaret bi xeteriya êrişên dewleta Tirk li ser yekitiya xaka Sûriyê jî, kir.
Rêveberiya Xweser bang li civata navneteweyî kir ku dawiyê li van gefan Tirkiyê bînin û li hemberî sûc û kiryarên Tirkiyê ên li Sûriyê, bi erka xwe rabin.
Rêveberiya Xweser: Em ê bi hemû derfetên xwe destkeftiyên gelê xwe biparêzin
Di dawiya daxuyaniyê de Rêveberiya Xweser teqez kir ku ew ê bi hemû derfetên xwe destkeftiyên gel û rêgezên şoreşa gel a demokratîk biparêzin û wiha bang li gelên herêmê kir:
“Em bang li tevahiya gelê Sûriyê û pêkhateyên Bakur û Rojhilatê Sûriyê dikin ku li dijî xeteriya êrişên dewleta Tirk a dagirker ên li ser Sûriyê, yekitiya xwe ava bikin û ji bo herêmên dagirkirî rizgar bikin û dawî li siyaseta qirkirinê bînin têkoşînê mezin bikin.”
