Li herêmên dagirkirî, sûc û hovîtiya dagirkeriya Tirk û çeteyên wê bê navber dewam dikin. Çeteyan her dawî 5 welatî ji navçeyên Mabata, Şiyê û Cindirêsê yên Efrînê revandin. Li gundê Kebaşînê yê navçeya Şêrawa jî, dagirker gundîyan neçar dikin ku ji gund derkevin, da ku li şûna malên wan bargeheke leşkerî ava bikin. Li herêmên din ên dagirkirî jî, tevlihevî û nearamî dewam dike.
Sûc û hovîtiya dewleta tirk û çeteyên wê li Efrînê û herêmên din ên dagirkirî dewam dikin.
Çeteyên dagirkeriya Tirk bi hincetên xwe yên weke her carê welatiyan li Efrînê derevînin da ku di berdêla berdana wan de pereyan werbigirin.
Li gorî Rêxistina Mafên Mirova a Efrînê, çeteyan her dawî 5 welatî li navçeyên Mabata, Şiyê û Cindirêsê revandin.
Li gorî rexistinê, navên kesên hatine revandin wiha ne:
Xelîl Şêxo yê ji navçeya Şiyê, çeteyan di berdêla berdana wî de 15 hezar dolar jê xwestine.
Cemîl Adil yê 27 salî yê ji gundê Kaxirê yê navçeya Mabata.
Ferîd Ebdilqadir yê 33 salî
Omer Atûz yê 32 salî
û Hisên Henan yê 30 salî ku ji gundê Keferdelê yê navçeya Cindirêsê ne.
Heta niha çarenûsa kesên revandî ne diyar e.
Welatiyên Efrînê ne tenê li Efrînê, li derveyî Efrînê jî bi heman hincetê têne girtin.
Dagirkeriya Tirk welatiyê bi navê Mihemed Salih yê navçeya Bilbilê li bajarê Stanbolê yê Tirkiyê revand.
Beriya wê jî gelek welatî bi heman hincetê li Tirkiyê hatin girtin.
Xelkê gundê Kebaşîn yê Şêrawan ji gund têne derxistin…. li şûna malên wan bargeheke leşkerî tê avakirin
Li aliyekî din, dagirkeriya Tirk welatiyan neçar dike ji gundê xwe derkevin.
Dagirkeriya Tirk li gundê Kebaşîn yê navçeya Şêrawa gundiyan neçar dike gund vala bikin, da ku bargeheke leşkerî li wir ava bike.
Çeteyan gundî agahdar kirin ku li malên mêtîngeriyê yên nêzî gundê Kebaşînê ku dagirkeriya Tirk ava kirine bi cih bibin.
Dagirkeran beriya vê jî gundên Basilê û Cilbirê, yên girêdayî navçeya Şêrawa vala kir û li şûna malên wan baregehên leşkerî ava kirin.
Di encama Şerê di navebra çeteyan de li Babê, welatiyek birîndar bû
Li bajarên din ên di bin dagirkeriya Dewleta Tirk de tevlihevî û binpêkirin serwer e.
Li bajarê Babê yê dagirkirî, di encama şer û pevçûnên di navbera çeteyan de li ser madeyên hişşbirê, welatiyek bi guleyên çeteyan birîndar bû.
Her wiha di encama pevçûna di navbera çeteyan de, tirs û xof di nava welatiyan de belav bû.
Cendirmeyên Tirk li Ezazaê êşkence li ciwanekî kirin
Li Ezazê jî, Cendirmeyên Tirk êşkence li ciwanê bi navê Mihemed Sifîre kirin.
