Hêzên Ewlekariya Hundirîn tunelek li Kampa Holê dît

Li kampa Holê ya ku bi hezaran malbatên DAIŞ’î lê dimînin û li ser hev bûyerên kuştinê pêk tên vê carê jî tunelek hate dîtin. Mala Êzidiyan a herêma Cizîrê bi hevkariya Hêzên Ewlekariya Hundirîn a li kampa Holê, jineke Êzidî ji kampê rizgar kirin.

Kampa Holê ku yek ji kampên herî xeternak li Cîhanê ye, bi hezaran malbatên çeteyên DAIŞ’ê lê dimînin.

Lê tevî gelek bangan û hişyariyan jî dewletên ku welatiyên wan li kampê ne ji bo wergirtina wan ti gavan navêjin.

Şaneyên DAIŞ’ê jî li nava kampê xwe bi rêxistin dikin û ev yek jî xeteriyê li ser herêmê û cîhanê dike.

Hêzên Ewlekariya Hundirîn ragihand ku îro di hundirê konekî de li beşa ‘El-Muhacîrat’ ya kampa Holê de tunelek hate dîtin.

Hat diyar kirin ku di demên dawî de metirsî hene ku çete li kampa Holê êrişên mîna yên li ser girtîgeha Sînaa ya taxa Xiwêran a Hesekê bikin.

Jineke Êzidî ji kampa Holê hat rizgarkirin

Mala Êzidiyan a Herêma Cizîrê bi hevkariya Hêzên Ewlekariya Hundirîn a li kampa Holê, jina êzidî ya bi navê Rosîta Hecî Baco rizgar kir.

Mala Êzidiyan a Herêma Cizîrê daxuyaniyek da û hûrgiliyên rizgarkirina jina êzidî eşkere kirin.

Di daxuyaniyê de hate gotin: “Bi hevkariya hêzên Asayîşê yên li kampa Holê em gihaştin dîlgirtiya Êzidî Rosîta Hecî Baco ku dema çeteyên DAIŞ’ê êrişî Şengalê kiribûn, ew dîl girtin.

Ji dema QSD`ê Baxoz rizgar kir Rosîta li kampê dimîne û hewl dida bi xizmên xwe re biaxive, lê nikaribû vê yekê pêk bîne.

Rosîta Hecî Baco 2006`an li gundê Til Qeseb ê Şengalê ji dayik bûye û 3`yê Tebaxa 2014`an ji aliyê çeteyan ve dîl hate girtin.

Çeteyan bavê wê, 3 pismam û zarokên wan qetil kirin û jinên wan revandin. Dayika wê jî ji bo ku çete wê nerevînin xwe dikuje.”

Rosîta Hecî Baco jî diyar kir ku ew ê vegere Şengalê li cem pismamên xwe bimîne.

Di dawiyê Mala Êzidiyan ji bo alîkariya wan spasiya rêveberiya Asayîşê ya li kampa Holê û rêveberiyê kir.

Back to top button