Serokê DYA Joe Biden piştî bûyî serokê welat û heta niha cara yekem li Rojhilata Navîn e.
Biden di serdana xwe ya despêkê de li Îsraîlê bû.
Di axaftina xwe ya li wir de, îşaret bi pêşîgirtina çekên nukleerî ya Îranê kir û got:
Ji bo Îran nebe xwedî çeka nukleerî wê hêzê weke çareya dawî bikar bînin.
Serokê DYA Joe Biden beriya serdana xwe ya Rojhilata Navîn bi kanala 12 ya Îsraîlê re hevpeyvînek kir.
Biden, diyar kir ku her çend peymana nukleerî ya 2015’an nebe asteng jî wê Muhafizên Şoreşê yên Îranê di lîsteya rêxistinên terorîst ên biyanî yên Amerîkayê de bimîne.
Li ser pirsa gelo ew ê hêzê bikar bîne da ku nehêle Tehran bigihîje çekên nukleerî, Biden wiha got:
“Eger ev çareya dawî be, erê.”
Ji aliyê din ve Îran diyar dike ku tenê ji bo armancên aştiyane xebatên xwe yên li ser çekên nukleerî didomîne.
Di peymana sala 2015’an de bi aliyên din re, Tehran razî bû ku bernameya xwe ya nukleerî sînordar bike.
Ev yek jî di berdêla rakirina cezayên li ser Îranê de erê kir.
Serokê berê yê Amerîkayê Donald Trump di sala 2018’an de bi awayekî yekalî ji peymanê vekişiyabû û dest bi sepandina cezayên li ser Îranê kiribû.
Piştî vê nêzîkî salekê, Tehranê gav bi gav hin ji sozên xwe yên di çarçoveya rêkeftinê de li hember vê pêngava Amerîkayê berda.
Hewldanên ji bo dubarekirina peymanê heta niha bi ser neketin.
Berpirsên payebilind yê Amerîkî ji Reutersê re ragihand ku şansê vegera li peymanê piştî hevdîtina du hefte berê li paytexta Qeterê Doha pêk hatî kêm bûye.
Partî di meha Adarê de pir nêzî ji nûve kirina peymana nukleerî ya 2015an bûn.
Lê belê danûstandinên Viyanayê yên ji bo jinûve zindîkirina peymanê, ji ber ku Tehran dixwest ku Muhafizên Şoreşê yên Îranê ji ‘lîsteya terorîstên biyanî’ ya DYA’yê bê derxistin, bi dawî bû.
Li gorî ajansa Reutersê, ji bo rênedayîna Îran a bûyîna xwedî çekên nukleerî, serokê Amerîka Jeo Biden û Serokwezîrê Îsraîlê Yair Lapid peymaneke hevbeş îmze dike.
Rayedarekî rêveberiya Biden got;
Wê peyman têkiliyên ewlehî yên demdirêj di navbera Amerîka û Îsraîlê de berfireh bike.
