Cîgira hevserokatiya Meclisa Rêveber a Rêveberiya Xweser Emîne Osê têkildarî rewşa awarte ya li herêmê nirxandin kir.
Emîne Osê ragihand wan ji bo rewşa heyî şaneyeke aloziyê ava kirine û tê de gelek komîte hatine avakirin.
Her wiha eşkere kir ku hewldanên dîplomatîk hene ku rê li pêşiya şer were girtin, lê heger şer çêbû, ew amade ne.
Ji dema ku Rêveberiya Xweser rewşa awarte li herêmê ragihandiye, gel û hemû saziyên wê ketine tevgerê û li gorî vê rewşê xwe amade dikin.
Li ser amadekariyên ku heta niha di vî alî de hatine kirin, Cîgira hevserokatiya Meclisa Rêveber a Rêveberiya Xweser Emîne Osê ji ajansa Hawarê re axivî.
Emîne Osê da zanîn piştî ragihandina rewşa awarte wan şaneyeke aloziyeke ava kir.
Ev şane jî li gorî wê, ji komîteya tenduristî, aborî, parastin, şaredarî û kar û barên civakî pêk tê.
Emîne Osê: Hemû desteyên me di nav amadekariyan de ne
Emîne Osê li ser xebatên ku van komîteyan heta niha kirine ev agahî dan:
“Her komîte plansaziyek ji xwe re derxistin û pêşkêşî Rêvebriya Xweser kir.
Desteya Tenduristiyê ji bo peydakirina dermanan û perwerdekirina gel ji bo destwerdana lezgîn plansaziyek danî û niha pêk tîne.
Desteya Aborî jî bi heman rengî ji bo peydakirina madeyên bingehîn bernameyek danî.
Desteya Kar û Barên Civakî û Xebitandinê jî, li ser kampan geriya da ji asta amadebûna wan ji bo pêşwazîkirina koçberan, teqez bibe.
Desteya Xweparastinê jî perwerdeyên pêwîst di aliyê bikaranîna çekan de dane destpêkirin.”
Emîne Osê: Hewldanên dîplomatîk hene ku rê li pêşiya şer bê girtin
Emîne Osê da zanîn ku niha ev komîteyên ku di şaneya aloziyê de girtine, karê xwe didomînin û Meclisa Rêveber jî van xebatên wan dişopîne.
Dawiya nirxandina xwe Cîgira hevserokatiya Meclisa Rêveber a Rêveberiya Xweser Emîne Osê tekez kir li ser asta dîplomatîk, Rêveberiya Xweser hewl dide ku şer pêk neyê, lê heger pêk were jî ew amade ne.
