Fermandarê QSD’ê Mazlum Ebdî ji Rojnameya Yenîzogurpolîtîka re axivî. Ebdî diyar dike ku niyeta dewleta Tirk a pêkanîna êrişeke bejahî hê dewam dike û ev peyam da: Li hemberî êrişên dewleta Tirk amadekariyên me zêde ne. Di şerekî muhtemel de em dikarin bibin xwe înîsiyatîf.
Rojnameya Yenîzogurpolîtîka a li Almanyayê weşanê dike, têkildarî êrişên dawî yên dewleta Tirk, bi fermandarê QSD’ê Mazlum Ebdî re axivî.
Li ser pirsa, piştî tevgerên dagirkeriyê yê 2018 û 2019’an gelo QSD’ê kete nava muhasebeke çawa, Mazlum Ebdî ev nirxandin kir:
Artêşa Tirk hêza duyemîn a NATO ye.
Mazlum Ebdî : Dagirkirina bajarên me bi destûreke cîhanî pêk hat
Dema mesele dibe gelê Kurd, ew tevahiya teknîk û hêza xwe bi awayekî hovane bi kar tîne.
Terorîzekirina civaka Kurd bûye konsepteke di alfabeya siyaseta dewleta Tirk de.
Em jibîr nekin ku dagirkirina Efrîn, Serêkaniyê û Girê Spî ne tenê bi hêza dewleta Tirk pêk hat.
Li wir hevkariyeke cîhanî jî hebû. Rûsya û Amerîkayê destûr dan êrişan.
Piştî encam salên derbasbûyî, nirxandin û rexnedayîneke baş hat kirin.
Mazlum Ebdî: Ev 3 sal in em amadekariya şer dikin
Artêşa Tirk çendî xurt be jî, me amadekariyên mezin kirin.
Êdî wê kefa mêzînê li aliyê me be.
Di 3 salên bihurî de, ji bo parastina ax û civaka xwe, me amadekariyên xweparastinê xurt kirin.
Me gelên xwe li gorî vê yekê bi rêxistin û amade kir. Ango me hêza xwe ya cewherî derxist holê û bi hêz kir.
Mazlum Ebdî di hevpeyvîna xwe de behsa guhertina mêzîna siyasî ya li cîhan û herêmê jî kir û got:
Êdî ne tenê em; gelê Sûriyê û welatên destekê didin me jî dagirkeriyê qebûl nakin.
3 sal in serokkomarê Tirkiyê Erdogan gelek caran behsa dagirkirina Kobanê, Minbic û Til Rifetê kir.
Lê nedikaribûn gavekê jî biavêje.
Bê goman sedemên vê yekê hene.
Mazlum Ebdî : Çavkaniya me a baweriyê hêz û gelê me ye
Beriya her tiştî baweriya me ya mezin bi cewherê hêza me û gelê me heye.
Ne tenê di warê leşkerî de, hevgirtina civakî û yekîtiya pêkhateyên herêmê roleke xwe ya mezin hebû.
Di van 12 rojên bihurî de, ev rastî derket holê.
Êdî destpêkirina tevgereke nû ya dagirkeriyê ne hêsan e.
Fermandarê QSD’ê ragihand ku wan demeke dirêj bû hesabê êrişeke wiha dewleta Tirk dikir û got:
Dewleta Tirk û hukûmeta wê ya faşîst gihiştine nefesa xwe ya dawiyê.
Mazlum Ebdî: Dixwazin tola têkçûyîna li Zapê hilînin
Dîtin ku li Zapê bi ser neketin, lewra ji bo desthilatê careke din bi dest bixin, berê êrişên xwe dan me.
2 armancên van êrişan hebûn; gelê me bitirsînin û herêmê vala bikin. Her wiha bi operesyona asîmanî re hêzên me şok bikin û piştre operesyona bejahî dest pê bikin.
Lê rastiyeke di van rojên dawiyê de derket pêş, gelê me helwêsteke berxwedêr nîşan da û li hêzên xwe xwedî derket.
Mazlum Ebdî : Em ji şerekî mezin re amade ne
Ji xwe amadekariyên ku ev 3 sal in hêzên me dikin, pozîsyona wan xurt kir.
Dewleta Tirk 50 balafirên şer bikar anîn, lê nekaribû li Kobanê û Minbicê şervanekî me şehîd an jî birîdar bike.
Derket holê ku hêzên me ji şerekî wiha re amade ne.
