Cindirêsê jî, yek ji navçeyên herî zêde ji erdhejê bandor bûye. Heya vê kêliyê gelek avahî hene tu tîmekî rizgarkirinê bi ser de neçûye. Dayikên li Cindirêsê banga alîkariyê dikin û tu alî deng ji xwe nayîne.
Kesên ku berê barê wan giran bû, niha jî di bin wan kavilan de barê wan girantir e û li hêviya alîkariyê ne.
Ne rêxistineke mirovî ne jî aliyekî din deng û êşa wan nabihîze, her kesî çavên xwe girtiye û wekî ku tiştek li Cindirêsê rû neda ye.
Xelkê Cindirêsê bi tenê di nava êşa xwe ya dijwar de hatine hiştin
Li Cindirêsê ku bi sedan avahî hatin xwarê û niha bi sedan kes di bin kavilan de ne, kes naçe bi hewara wan ve û di halê xwe de hatine hiştin.
Li gorî Efrîn POST çeteyên dewleta Tirk rê nadin tu kesî ku alîkariyê bikin û xelkê ji bin kavilan derxin, heya ku ew avahiyên wêranbûyî bikolin û diziyê bikin, paşê rê didin milet ku alîkariyê bikin.
Hate diyarkirin ku Çeteyên Îslamî xwarin û alavên tenduristiyê desteser dikin û dişînin kampên di bin serweriya wan de li gundê Qaziqlî.
Bendên kontrolê yên Feyleq El-şam jî ku li ser rêyên têketin û derketina ji bajêr balvbûne alîkariyên mirovî didizin û difroşin welatiyan.
Tîmê Rizgarkirinê yê Misrî duh malbatek û zarokekî biçûk ku di hembêza bavê xwe yê ku jiyana xwe ji dest dabû rizgar kirin.
Hate ragihandin ku bi dehan ji xelkên navçeyên Raco, Bilbilê, Şera û Şêrawayê berê xwe didin Cindirêsê ji bo ku alîkariyê pêşkêş bikin, lê ji ber nebûna alavên kolandin ew jî sekinî dimînin.
Her wiha hate destnîşankirin ku ji ber lerzînên ku çêdibin tîmên rizagariyê sekinîne ji ber cardin hejmareke avahî hatin xwarê.
Tê gotin; Avahiyên kolana 16’an ya Cindirêsê bi temamî hatine xwarê û heya vê kêliyê cenazeyek jî jê nehatiye derxistin, ji ber ku tîmên rizgariyê hê neçûne wir.
Hejmara kesên ku jiyana xwe ji dest dane 1000 derbas kiriye û nêzî 4000 malbat ji tirsa ku avahî bi ser wan de werin xwarê bi vê sermaya zivistanî re li çolan dimînin.
