Di erdheja li Sûriyê her diçe hêviya rêzgarkirina kesan kêm dibe û hejmara qurbaniyan zêde dibe. Çavdêriya Sûriyê SOHR eşker kir ku di erdheja li Sûrî zêdetirî 5 hezar û 200 kes jiyana xwe ji dest da.
Li gelek bajarên Sûriyê xanî û avahî bi ser xwediyên wê ve ketin.
Bi hezaran kesî jiyana xwe ji dest dan, birîndar bûn û bê cih û war man..
Hîn jî termên bi sedan qurbaniyên erdhejê di bin kevir û kavilên avahiyên hilweşiyî de ne.
Tîmên rizgarkirinê ji ber dijwariya kar û piştî xebatên berdewam ên nêzî 6 rojan heta îro negihîştine gelek kesan.
Çavdêriya Mafên Mirovan a Sûriyê SOHR ragihand ku di erdheja li Sûriyê heta niha zêdetirî 5 hezar û 200 kesî jiyana xwe ji dest daye.
Her wiha çavdêriyê da zanîn ji bilî vê daneyê, hezar û 202 welatiyên Sûrî di erdheja li bakurê Kurdistanê jî jiyana xwe ji dest dane.
Hîna jî bi dehan ji maxdûrên erdhjê li kolanan bi tenê ne, ji ber ku alîkariyên ji gelê Sûriyê re tên, ji aliyê kesên girêdayî hikûmeta Şamê ve tên destserkirin û li bazarên Şamê tên firotin.
Her wiha li herêmên bakurê Sûriyê yên di bin dagirkiriya dewleta Tirk û çeteyê wê de jî bi sedan avahî hilweşiyan û welatî bûn qurban.
Herî zêde bandora erdhejê li Efrîn û Cindirêsê bû.
Li wan herêman ji ber kêmbûna karînên bijîşkî û tîmên rêzgarkirinê, hejmara qurbaniyên erdhejê her kêlî zêde dibe.
Tevî hewar û bangên şêniyên wan herêman ji bo alîkariyê, dewleta Tirk derbaskirina alîkariyê asteng dike.
Rêveberiya Xweser ya Bakur û Rojhilatê Sûriyê ji roja erdhejê alîkarî ji madeyên Tenduristî, Sotemenî û Xwariyê amade kir da bişîne deverên zirar dît.
Lê ev alîkarî ji bo herêmên dagirkirî ji aliyê dewleta Tirk hate astengkirin û ji bo herêmên din jî hêzên hikumetê bac li karwanan ferz kir.
Rêveberiya Xweser bi derfetên heyî dixwaze alîkarî bike û Îro jî Rêveberiya Xweser ragihand ku tevahî deriyên wan li pêş alîkariyên ji derve û hundirê welêt ji bo mexdûrên erdhejê, vekirî ye.
