Li Îtalyayê ji ber bahoz û şewatê herî kêm 5 kes mirin.
Hikumet nîqaşê li ser wê yekê dike ku li herêmên ketine bin bandora felaketê rewşa awarte ragihîne.
“Global Forest Watch” jî ragihand ku di nava 10 salan de li cîhanê 82 mîlyon hektar herêma daristanî şewitiye.
Serê cîhanê bi şewatên daristanê re di êşe.
Şewatên daristanan yên li seranserê cîhanê, metirsiyek mezin a guherîna sîstema avhewayê nîşan dide.
Li Ewropa berdêla herî giran a şewatê Îtalya û Yewnanîstan dide.
Serokwezîra Îtalya Georcia Meloni bi daxuyaniyekê ragihand ku herêma Brescîa ya li bakurê welêt keçeke 16 salî û li Lîssoneyê jî jinekê jiyana xwe ji dest dan.
Bayê ku hêza wê saetê 110 kîlometre bû, her wiha baran û zîpikê sibeha Sêşemê bandor li herêma Mîlanê kir.
Li Mîlanê ku weke paytexta aboriyê ya welêt tê naskirin kolan di bin avê de man, dar hilweşiyan û ji ber vê yekê gelek rê hatin girtin.
Şîrketa ragihandinê ya cemaweriyê diyar kir ku xisareke cidî li tevna elektrîkê bûye.
Li gel şert û mercên nebaş ên hewayê yên li bakurê welêt, li başûr jî germeke zêde heye.
Li gorî Parastina Sivîl a Sîcîlyayê germahî gihîştiye 47.6 pileyî.
Li gorî medya Îtalyayê li nêzî Palermoyê cesedên du kesên extiyar ji ber şewitîna mala wan hatin dîtin.
Hate ragihandin ku jineke din a 88 salî jî jiyana xwe ji dest daye.
Wezîrê Parastina Sivîl Nello Mûsûmecî diyar kir ku her kes li hemberî guhertina avhewayê ya ku bandorê li welatê wan dike helweseta xwe biguherîne.
Li Yewnanîstanê jî dema xebatên vemirandina agir de balafirek ket.
Li Cîhanê di nava 10 salan de 82 mîlyon hektar daristan şewitî
Li gorî daneyên malpera “Global Forest Watch” ya ku daneyên şewatên daristanên cîhanê berhev dike, di 10 salên dawî de li cîhanê 82 mîlyon hektar qada daristanê şewitiye.
Ev jî weke ziyana herî mezin a rûbera daristanê li cîhanê hatiye tomarkirin e.
2016 bi şewitandina 9,63 milyon hektar, sala herî bi şewat bû.
Şewatên herî mezin ên 10 salên dawî li welatên wekî Awûstralya, Rûsya, Kanada û Dewletên Yekbûyî yên Amerîkayê rû dane.
Niha jî şewatên daristanan ên li Kanada, Yewnanîstan, Cezayîr û Îtalyayê jî dewam in.
