Hevserokatiya Konseya Rêveber a KCK’ê bi wesîleya salvegera Komkujiya DAIŞ’ê ya li dijî civaka Êzidî daxuyaniyeke nivîskî weşand û got: “Em ê heta dawiyê bi Şengal û civaka Êzidî re bin û em ê ji qetlîamkarên ku ev êş anîne serê civaka Êzidî hesabên dîrokî bixwazin.”
Di sala 2014’an de çeteyên DAIŞ’ê di encama civîna amanê ku PDK, Tirkiye, Iraq û gelek welatên cîhanê tê de amade bûn êrişê Şengalê kir.
Di encama vê civînê de PDK’a ku 15 hezar peşmergê wî qaşo Şengal diparastin bêyî fîşengek biteqînin, reviyan û hiştin ku çeteyên DAIŞ’ê li Şengalê komkujiyê pêk bîne.
KCK’ê bi boneya 9’emîn komkujiya 3’ê Tebaxê daxuyaniyeke nivîskî şehîdên komkujiya Şengalê bibîranî û got:
KCK: Em ê tola dîrokî ji kujeran û hevkarên wan bipirsin
“Li pêşberî dîrokê em careke din diyar dikin ku weke tevgera azadiya Kurd em ê heta dawiyê bi gelê Şengalê û civaka Êzidiyan re bin.
Em ê ji qetlîamkarên ku ev êş bi civaka Êzidî dane kişandin û aliyên ku bi çeteyên DAIŞ’ê re alîkarbûne hesabên dîrokî bipirsin.”
KCK: Divê civaka Êzdî bikaribe xwe birêve bibe û çanda xwe biparêze
KCK’ê balkişand li ser nêzîkatiya hêz, sazî û rêxistinên cîhanî ya li hember civaka êzidî û ev nirxandin kir:
“Li ser vê civakê gelek qirkirin hatiye kirin, gelek ferman li ser wan hatine dayîn.
Berpirsyariya dîrokî ya hemû mirovayetiyê li hemberî vê civakê heye.
Ev berpirsyarî ew e ku divê şert û mercên wisa werin avakirin ku civaka Êzidî careke din qirkirinan nejî, civaka Êzidî karibe bawerî û çanda xwe bijî û şertên wê yên rêveberiya demokratîk û parastinê were avakirin.
Îroj pîvana nirx, rastî, exlaq, wijdan û hakaniyetê ya mirovahiyê nêzikatiya li hemberî Şengal û civaka Êzidî ye.”
KCK: Serweriya PDK’ê ya li Şengalê berdewamiya qirkirinê ye
KCK’ê balkişand li ser peymana 9’ê cotmehê ku li dijî vîna civaka Şengalê ji aliyê PDK’ê, Tirkiye û Hikûmeta Iraqê ve hatibû îmzekirin û ev tişt anî ziman:
“PDK, hikûmeta Iraqê li hember çeteyên DAIŞ’ê helwestek çawa nîşandan tê zanîn.
Heke gerîla ne li wir bûya û piştre hêzên YPG û YPJ’ê neçûna alîkariya gelê Şengalê wê komkujiyeke gelekî mezintir pêk bihata.
Peymana 9’ê Cotmehê ku li dijî vîna şengalê hatiye kirin heqaretek vê civakê ye.
Divê her kes di vê mijarê de helwesteke rast nîşan bide û dest ji ferzkirina li ser gelê Şengalê berde.
Lê belê peymaneke ku îradeya gelê Şengalê li ber çavan bigire û rêveberiya demokratîk û parastina gelê Şengalê qebûl bike.
Ev peymana ku PDK serdestiya Şengalê dike, bi tevahî antîdemokratîk e û ferzkirina wê tê wateya berdewamkirina qirkirina Êzidiyan.”
KCK: Divê her kes piştgiriyê bide mafê Rêveberiya Demokratîk a gelê Şengalê
KCKê di dawî de bang li hikûmeta Iraqê, NY kir ku piştgiriyê bidin mafê rewa ê demokratîk gelê Şengalê yê xwe rêvebirinê.
