Di saetên şevê de bi keştiyên bêmirov êrişî bendera Novorossiska hate kirin.
Lê tevî van êrişan jî Serokomarê Ukrayna Zelensky ji rewşa heyî nerazî ye.
Zelensky li wê yekê mikur hat ku ew li eniyên şer bi zehmetî pêşde diçin.
Ji Bendera Novorossisk ya li peravên Derya Reş a Rûsyayê saetên şevê de dengê teqînan bilind bû.
Di dîmenên li ser tûrên medya civakî tên parvekirin de jî metirsiyek zêde xuya dike.
Wezareta Parastinê ya Rûsyayê diyar kir ku êrîşa Ukraynayê ya li herêmê bi 2 wesayîtên behrê yên bêmirov (IDA) li dijî hêzên deryayî hatiye pûçkirin.
Hemwextî vê hat ragihand ku 10 balafirên bêmirov ên Ukraynayê li ser Kirimê hatine xistin.
Piştî êrişê xebatên sewqiyata li benderê hatin rawestandin.
Ukrayna hê derbarê vê mijarê de daxuyaniyek nedaye.
Novorossisk yek ji mezintirîn benderên bazirganî yên Rûsyayê li ser Deryaya Reş e.
Piştî Rûsya ji peymana genim vekişiya êrişên li Derya Rez zêde bûne.
Di destpêka vê hefteyê de, Rûsyayê êrîşî benderên Ukraynayê yên li Odessa û Çornomorsk û herwiha hin benderên wê yên li ser Dunayê kirin.
Li gorî nûçeya tûra BBC, heta niha Ukrayna bi bêtirî 10 keştiyên noqîvan yên bêmirov êrişî keştiyên Rûsya kiriye.
Zelensky: Li eniyên şer em rastî zehmetiyan tên
Li aliyekî din, Serokomarê Ukraynayê Volodymyr Zelensky got;
Artêşa Ukraynayê li eniyên şer ên li rojhilat û başûrê welêt li hemberî hêzên Rûsyayê rastî zehmetiyan tê.
Lê tevî vê yekê jî hêza Kîevê serketîne.
Volodymyr Zelensky di axaftina xwe ya doh êvarê diyar kir ku hêzên Ukraynayê li hemû qadên eniyê bi berxwedaneke tund a Rûsyayê re rû bi rû mane.
Zelenskiy got,
“Li wir şerekî dijwar heye.
Bi hemû hêza xwe hewl didin zarokên me bidin sekinandin.
Êrîşên pir tund tên.
Lê dijmin çi dike bila bike, hêza Ukraynayê bi ser dikeve.”
Ukrayna di Hezîranê de dest bi êrîşeke dijber kir da ku hêzên Rûsî ji xaka ku li rojhilat û başûrê welat kontrol kirî paşve bikşîne.
Lê heta niha ev êrişa dijber daxwazên Kîevê bicih neaniye.
Hêzên Ukraynayê, ku di êrîşên dijber ên sala 2022’an de karîbûn erdên derdora Kherson û Kharkovê vegerînin, niha bi parastineke bihêz a Rûsyayê re rû bi rû ne.
