Cûnta leşkerî ya li Nîjerê êdî hebûna xwe dixin misogeriyê.
Darbekaran ragihandin ku ew ji danûstandinên bi welatên Rojavayê Afrîka re amade ne.
Hemwextî vê yekê jî hate diyarkirin ku wê Serokomarê Nîjer Bazûm yê bi darbeyê ji erk hatî girtin, bi sûcê îxanetê bê darizandin.
Rêveberiya cûntaya ku li Nîjerê darbe pêk anî, ragihand ku ji bo çareserkirina krîza herêmê ew ji diyalogên bi welatên Rojavayê Afrîkayê re amade ne.
Her wiha diyarkirin ku dibe ku Serokê îstifakirî Muhammed Bazûm jî bi sûcê “xiyanetê” bê darizandin.
Berdevkê cûnta leşkerî Albay Amadu Ebduramanî di daxuyaniya xwe ya li ser televizyona dewletê da wiha got:
“Bazûm û hevkarên wî yên navxweyî û biyanî ji ber xiyanet û têkbirina ewlehiya hundir û derve ya Nîjerê wê li ber meqamên şareza bên darizandin.”
Serokomarê Nîjer Bazûm di hepsa malê de tê girtin
Serokomarê Nîjer Bazûm yê bi awayekî demokratîk hat hilbijartin, 26’ê Tîrmehê ji aliyê parêzvanên serokatiyê ve ji erk hat girtin.
Bazûm ji wê demê ve bi hevjîn û kurê xwe re li avahiya serokatiyê ya li paytext Niameyê di hepsa malê de tên girtin.
Derdorên nêzî Serokomar dibêjin li cihê ew dimîne elektirîk û av qut bûye û xwarina wan nemaye.
Cûntayê ev îdia red kir û siyasetmedarên Rojavayê Afrîkayê bi kampanyaya berovajîkirina agahiyan ya bo reşkirina wan sûcdar kir.
Li Nîjerê zexta navnetewî ya li ser cûnta leşkerî
Di vê pêvajoyê de zextên navneteweyî yên li ser cûntaya ji bo azadkirina Bazûmê û ji nûve avakirina hikumeta demokratîk jî zêde dibin.
Yekser piştî derbeyê, bloka herêmî ya Afrîkaya Rojava, ECOWAS, heft roj dem da rejîma cûntayê da ku Bazûm vegerîne ser desthilatê û gefa bikaranîna hêza leşkerî xwar.
Lê dema ev wext bi dawî bû ji her du aliyan jî tu gav nehatin avêtin.
Hefteya borî, ECOWAS biryar da ku ji bo vê senaryoyê hêzek amade ya hevbeş bicîh bike.
Hîn ne diyar e wê ev leşker kengê destwerdanê li Nîjerê bikin.
