Li Fasê piştî erdheja waranker jimara qurbaniyan giran dibe.
Jimara kesên jiyana xwe ji dest dayîn gihişt nêzî 3 hezarî.
Her wiha piştî 3 rojan tîmên rizgarkirinê nû xwe gihandin hinek gundan.
Di kêliyên tirsnak ên piştî erdhejê de li gundê piçûk ê Algou yê li Çiyayên Atlasê, qîrîn ji bin kavilên avahiyan bilind bûn.
Lê her ku saet di ser re derbas dibûn ti tîmeke pispor a alîkariyê nikarîbû destekê bide hewldanên bêhêvî yên gundiyan.
Vê carê qîrînê cihê xwe ji bêdengiyê re hişt.
Piştî 3 rojên despêkê yên erdhejê tîmên rizgariyê yên Spanya bûn yekem tîm ku karên xwe bigihînin hewara gundiyan.
Di erdheja herî kujer a 60 salên dawîn de, li welêt hat dîtin, jimara fermî ya mirina heta niha 2 hezar û 862 e.
Her wiha 2 hezar û 562 jî birîndar bûne.
Di wextekî ku tîmên rizgarkirinê kêm dimînin de, hikumeta Fasê di bin zextê de ye ku bêtir alîkariyên navneteweyî qebûl bike.
Heta niha, Fasê tenê ji çar welatan, Spanya, Brîtanya, Qeter û Îmaratê alîkariyên tên qebûl kiriye.
Rêveberên welat di wê yekê de israr dikin ku tîmên alîkariyê ji çar aliyên cîhanê nepejirînin.
Ew îdia dikin ku ji nişka ve hatina tîmên ji çar aliyên cîhanê bo Fasê wê tevliheviyê çêbike.
Erdheja bi pileya 6,8’an li Çiyayên Atlasê yên li başûrê Marakeşê çêbû û bû sedema gelek gundên li deverên asê wêran bibin.
Hema bêje nîvê şêniyên gundê Tafeghte yê ku ji 200 şêniyan pêktê mirin û gelek kes jî winda ne.
Makîneyên kar yên giran bi zehmetî rêyên ku di dema erdhejê de ji ber kevirên mezin ên ku li ser rêyan dikevin, radikin.
Her wiha helîkopter jî ji bo gihandina alîkariyan ber bi herêmên çiyayî ve gelek seferan dikin.
Bangên ji bo qebûlkirina alîkariyên biyanî
Rêxistina Tenduristiyê ya Cîhanê ragihand ku bêtirî 300 hezar kes ji erdhejê bandûr bûne.
Di erdheja sala 1960’î ya li Egadir a Fasê de di navbera 12 heta 15 hezar kes mirin.
Mizgefta Tinmelê ku yek ji bermahiyên dîrokî yên li herêma çiyayî ye, zirareke mezin dît.
Li beşa bajarê kevnar ê dîrokî yê Marakeşê jî wêranî çêbû.
Zext li ser hukûmeta Fasê jî zêde dibe ku pêşniyarên alîkariyê ji welatên cûrbecûr qebûl bike.
Di nav welatên ku alîkariyê pêşkêş dikin de DYA, Tûnis, Tirkiye, Taywan û Fransa hene.
