Li Îsraîlê hejmara kesên ku ji ber êrişa Hamasê ya 6’ê Cotmehê hatin kuştin ji hezar û 200 derbas bû.
Li herêma Xezayê jî êrişên Îsraîl rê li ber ku kuştina 900 kesî vekir.
Ji herdû aliyan bêtirî 7 hezar kes jî birîndar bûne.
Di vê navberê de piştî Lubnanê, şevê din ji aliyê Sûrî ve jî moşek ber bi Îsraîlê ve hatin avêtin.
Berdevkê Hêzên Parastina Îsraîlê Jonathan Conricus (canitin konrîkus) têkildarî êrişa 6’ê Cotmehe ya Hamasê daxuyaniyek da.
Conricus ragihand ku êriş di asta hejandinê de bû û got;
“Hejmara kuştiyên Îsraîlê ji hezar û 200 derbas bû.
Her wiha zêdetirî 2 hezar û 700 kes jî birîndar bûne.
Fikarên me hene ku hejmara kuştiyan zêdetir bibe.
Şerê Hamas û Îsraîlê: Hejmara kuştiyên li Xezayê ji 900 derbas bû
Encama giran a li aliyê Filîstînê jî ne kêmî ya Îsraîlê.
Wezareta Tendirûstiyê ya li Xezayê eşkere kir ku ji ber êrişên artêşa Îsraîlê hejmara kuştiyên wan ji 900’î derbas bû.
Nêzî 5 hezar mirov jî birîndar bûne.
Di vê navber de êrişên dijwar ên li dijî Xezayê şevê din jî dewam kirin.
Her çendî di van êrişan de deverên sivîl jî dibin armanc, artêşa Îsraîlê îdîa kir ku wan bêtirî 450 navendên Hamasê kirine armanc.
NY: Ji ber şer û êrişan 180 hezar kes li Xezayê bê xanî man
Neteweyên Yekbûyî jî bi daxuyaniyekî îşaret bi encama kambax a şerê Îsraîlê û Hamasê kir.
Li gorî daneyên dawî, tenê li Xezayê ji ber êrişan bêtirî 180 hezar mirov bê xanî ne û vê gavê ji neçarî li dibistanan hatine bicihkirin.
Her wiha hat gotin ji ber zêdebûna hejmara kuştiyan, êdî cih li morgan nemaye.
Têkildarî heman mijarê, Wezareta Karê Derve a Filîstînî eşkere kir ku ji ber êrişên Îsraîlê 23 hezar avahî, 600 wargeh, 10 navendên tendirûstiyê û 48 dibistan rûxiyan e.
Îsraîl: Em xwe ji tevgera bejahî re amade dikin
Tevî encama giran a şerê 5 rojan jî diyar ku wê Îsraîl bi tevgera esmanî bi sînor nemîne.
Wezîrê Parastinê Yoav Gallant doh li ber herêma dorpêçkirina Xezayê ev peyam da:
“Me ji ezman ve dest bi operasyonê kir. Demeke nêz em ê ji bejahî ve jî werin. Divê were zanîn ku wê êrişên me hê dijwartir bibin.”
Ji Lubnan û Sûrî moşek ber bi Îsraîlê ve hatin avêtin
Di vê navberê de piştî Lubnanê, ji aliyê Sûrî ve jî moşek ber bi Îsraîlê ve hatin avêtin.
Her çendî gelek ji wan moşekan hatin bêbandorkirin jî artêşa Îsraîlê di cih de bersiv da û hin deverên xaka Sûrî bombardiman kir.
