Endamê berê yê CPT’ê Jean-Pîerre Restellînî 3 caran li Îmraliyê serdana Rêbe Apo kir. Restellînî diyar kir ku şert û mercên tecrîdê nayên qebûlkirin û got: “Abdullah Ocalan bêyî nîqaş rêberê gelê Kurd e, ez azadiya wî dixwazim.”
Endamê berê yê CPT’ê Jean-Pîerre Restellînî ku di salên 1999, 2010 û 2013’an de şandeya Komîteya Pêşîgirtina li Êşkenceyê ya Ewropa (CPT) çû Îmraliyê derbarê tecrîdê de bersiv da pirsên Medya Haber tv.
Jean Pîerre Restellînî zêdeyî 30 sal in di bin sîwana Komîteya Pêşîgirtina li Êşkenceyê ya Ewropa de weke doxtorek pispor dixebite û wiha behsa serdanê xwe yê Îmraliyê kir:
Ez ji bo dîtina Abdullah Ocalan sê caran çûm îmraliyê.
Serdana yekem sala 1999’an bû, di hevdîtina me ya destpêkê de, Abdullah Ocalan pir nerehet bû; ji ber ku nû hatibû girtin.
Ne dizanî ka em kî ne û armanca me fêm nekiribû ku gelo em ji bo alîkariya wî li wir in yan na.
Di serdanên me yên sala 2010 û piştre de, pir rehet bû.
Weke bijîjkekî têkildarî tenduristiya Ocalan, ez bi fikar bûm. Lewma min destûr xwest ku ez tenduristiya wî kontrol bikim û min erka xwe pêk anî lê ez niha nikarim encama parve bikim.
Ez ti carî serdana duyem ji bîr nakim. Piştî vê serdanê em weke hevalên baş man. Ocalan kesekî têra xwe sempatîk e.
Serdana me ya sala 2013’an jî bi heman rengî derbas bû û ji ber ku me hevdû dîsa dît, em bi kêfxweş bûn.
Ji ber ku dizanî ez bi Fransî diaxivim, ji min re digot, “My French Doctor”. Ev gotin bi xweşa min dihat.
Jean Pîerre Restellînî diyar kir Abdullah Ocalan dizane ku gelê wî bi wî re ye û ev rastî wî li Îmraliyê li ser piyan dihêle.
“Tirkiye divê bersivê bide rapora CPT’ê”
Jean Pîerre Restellînî neweşandina rapora serdana dawî ya bê hiqûqî pênasekir û got:
Tirkiye neçar e ku bersiva xwe ya têkildarî serdana dawî ya CPT’ê li Îmraliyê pêk anî, biweşîne.
“Ji Abdullah Ocalan û azadiya wî ditirsin”
Jean Pîerre Restellînî dazanîn ku Tirkiye ji ber fikrê Rêber Apo ditirse di tecrîdê de israr dike û ev nirxandin kir:
“Ji fikrê Ocalan ditirsin. Dizanin ger Ocalan azad bibe wê çi guhertin çêbibe, ji ber vê ditirsin. Ne tenê Tirk, welatên din ên ku Kurd lê dijîn jî ji Ocalan ditirsin.
Ew bi fikar in ku ger Ocalan azad bibe, ew ê kurdên van welatan bikin yek. Ew vê rewşê û azadiya Ocalan ji bo xwe weke xeteriyekê dibînin.
“Birêz Ocalan bavê gelê Kurd e û fikrê wî çareserî ye”
Restellînî Rêber Apo weke bavê gelê kurd pênasekir û ev nirxandin kir:
Divê ji pirsgirêka kurd re çareseriyeke were dîtin.
Nabe weke pirsgirêka îro ya Îsraîl Filîstînê be.
Lê ez wisa difikirim ku Ocalan “bavê” gelê kurd e, yanî rêberê gelê kurd e û dê wisa bimîne û fikrên wî ji bo gelê kurd û çareseriya pirsgirêka kurd gelek erênî û girîng in.
Di dawî de Jean Piere diyar kir ku ew dixwaze di zûtirîn dem de Rêber Apo di girtîgehê de derkeve û ji bo azadiya wî jî ev pêngav û çalakiya li gel NY gelek girîng e.
HEDEP têkildarî tecrîda li dijî Rêber Apo daxuyaniyek lezgîn da
