Li nava Xeza wê agirbest neyê ragihandin.
Serokwezîrê Îsraîlê Netanyahu careke din gotina xwe ya têkildarî agirbestekî bi Hemasê re dubare kir.
Hemasê jî ragihand ku Îsraîlê 3 nexweşxane bombebaran kiriye.
Di nava vê şerê qirêj de jimara filistîniyên hatine kuştin nêzî 11 hezarî bûye.
35 rojin Xeza bi êrişên herî dijwar yên Îsraîlê re rûbibûr ye.
Avahiyên wêranbûyî û lêgerîna artêşa Îsraîl ya li nava Xeza.
Şerê ku dawiya wê xuya nake.
Îsraîlê êrişî 3 nexweşxaneyên li Şerîda Xezayê kir
Li gorî Wezareta Tenduristiyê ya hikumeta Hemasê şevê din artêşa Îsraîlê li Şerîda Xeza 3 nexweşxane bombebaran kiriye.
Berdevkê Wezareta Tenduristiyê ji televîzyona El Jazeera re axivî û got,
“Dagirkeriya Îsraîlê di nava çend saetên dawî de êrîş bir ser çend nexweşxaneyan.”
Hate ragihandin ku bombe li hewşa nexweşxaneya El Şîfa hatiye barandin ku nexweşxaneya esasî ya li bajarê Xezeyê û ji ber êrîşê kuştî û birîndar hene.
Îsraîlê êrîş piştrast nekir, lê beriya niha îdîa kiribû ku Hamasê li binê nexweşxaneya El Şîfa navenda fermandariyê û tunel çêkiriye.
Ev sûcdarî jî ji aliyê koma Fîlîstînî ve hatibû redkirin.
Di êrişên Îsraîlê de heta niha nêzî 11 hezar Filistînî hatine kuştin
Wezareta Tenduristiyê ya Xezayê doh daxuyaniyek dabû û diyar kiribû ku ji 7’ê Cotmehê ve di êrişên Îsraîl yên li ser Xezayê de, nêzî 11 hezar Filistînî hatine kuştin.
Li gorî nûçeya Haaretzê, artêşa Îsraîlê û servîsa îstîxbarata navxweyî ya Îsraîlê Şîn Bet roja Înê daxuyaniyeke hevpar dan.
Di daxuyaniyê de, diyar kirin ku li bakurê Xezayê di operasyona li Cîbaliyeyê de endamên hêza (elît) Nûhba ya Hemasê hatine kuştin.
Serokwezîrê Îsraîlê Bunjamîn Netanyahû diyar kir ku artêş di êrîşa li ser Hamasê de ‘bi rengekî baş bi pêş ve diçe’ û anî ziman ku nêta wan nîne ku Xezeyê bi rê ve bibe yan jî dagir bike.
Netanyahû ji Fox Newsê re axivî û got,
“Em hewl nadin ku Xezeyê bi rê ve bibin.
Her wiha em hewl nadin dagir bikin, lê belê em hewl didin paşerojeke baş bidin wan û xwe.”
Balafirên Îsraîlê li cihên Hizbûllahê ya Libnanê xistin
Artêşa Îsraîlê her wiha diyar kir ku operasyonên ji bo tunekirina binesaziya ‘Hîzbûllahê’ ya li Libnanê dewam dikin.
Di daxuyaniyê de hate gotin,
“Balafirên şer, li hemberî êrîşên li ser Îsraîlê li hedefên Hîzbûllahê yên li Libnanê xistin.”
Amerîka: Îsraîl wê rojane 4 saet navberê bide oparasyonên xwe
