Sibê 8’emîn salvegera rizgarkirina Şengalê ji DAIŞ’ê ye.
Fermandar û şervanên Êzidî di serî de ev roj li Rêber Apo, civaka êzidî hemûyan pîroz kirin û gotin: Çawa bi fikir û felsefeya Rêber Apo Şengal hate parastin, îro ji bo azadiya wî erkê me ye em seferber bibin.”
Her wiha gelê Ereb yê Şengalê jî bi gerandina govendên gelerî ev roj bi coşek mezin pîroz kirin.
13’ê Mijdara 2015’an navenda bajarê Şengalê ji rêxistina terorîst a hov DAIŞ’ê hate rizgarkirin.
Piştî rizgariyê Êzidiyên koçber bûbûn ref bi ref vegeriyan Şengalê û bûn xwedî rêveberî û hêzên parastinê.
Yek ji endamê Fermandariya Yekîneyên Berxwedana Şengalê-YBŞ’ê Kendal Çiya qala wan rojan kir.
Kendal Çiya di serî de Egîd û qehremanên bûne cangorî bi rêzdarî bibîranî û got:
“Eger wan ew fedayitî nekiriba, bêguman ne Şengal rizgar dibû û ne emê hatibana van rojan.”
Kendal Çiya: Fikrê Rêber Apo pêşî li fermanê girt
Fermandar Çiya ev roj li Rêber APO û civaka Êzidî hemûyan pîroz kir û ev tişt anî ziman:
Fikirê Rêber Apo, li pêşiya fermanê bû asteng û civaka Êzidî ji qirkirinê rizgarkir.
Çawa bi fikir û felsefeya Rêber APO Rêveberiya Xweser a Şengalê hate avakirin, îro ji bo azadiya wî erkê me ye em jî weke civaka Êzidî seferber bibin.”
“Gel li hemberî rastiya PDK û Tirkiyê şiyarbûne”
Kendal Çiya guhertinên di nav 8 salan de nirxand û got:
Xelkê Başûr û Şengalê li hemberî rastiya PDK û Tirkiyê yê ji bo têkbirina vîna gel şiyarbûne.
Ji Fermandarê YBŞ’ê Kendal Çiya di dawiyê de bal kişande li ser hêza gel a rêxistinbûyî û ev peyam da:
Emê ji vir û wiha de hê bêtir xwe bi rêxistin bikin û bi xwe mafê xwe bi dest bixin.
Şervanên Êzidî: Emê têkoşîna xwe mezintir bikin
Bi boneya salvegera rizgarkirina Şengalê Şervanên Yekineyên Jin ên Şengalê-YJŞ jî axivîn.
Şervan Delal Întîkam û Zîlan Egîd bi vê wesileyê banga mezinkirina refên YJŞ’ê kirin û gotin:
Jin li Şengalê hêza çareseriyê ye.
Ji ber vê yekê pir girînge ku keçên Êzidî berê xwe bidin nava refên YJŞ’ê.
“Eger Êzidî naxwazin ferman dubare bibin divê vegerin”
Şervanan anî ziman ew ê têkoşîna xwe mezintir bikin û diyar kirin eger Êzidî naxwazin ferman dubare bibin, divê vegerin ser axa xwe.
Şervanên YJŞ’ê destnîşan kirin ku civaka wan bi saya fikir û bîrdoziya Rêber Apo, bûye xwedî hêz û wiha bi dawî kirin:
Niha baweriyeke mezin ya civaka me çêbûye, li Şengalê de bijîn.
Ji ber ku êdî dizanin piştevanên wan hene ku wan biparêzin.
Gelê Ereb rizgarkirina Şengalê bi gerandina govendê pîroz kir
Her wiha 8’emîn salvegera rizgarkirinê, ji aliyê gelê Ereb yê Şengalê jî hate pîroz kirin.
Xelkê herêmên Ereb li gundê Barê ya Şengalê bi vê boneyê li hev kombûn.
Welatiyên Ereb kêfxweşiya xwe a ji bo vê rojê bi gerandina govendên xwe yên gelêrî nîşan dan.
