Bi wesîleya 25’ê Mijdarê Roja Têkoşînê ya Navneteweyî ya li dijî Tundiya li Jinê KJAR’ê daxuyaniyek da. KJAR’ê diyar kir ku ew ê bi pergala xweparastinê, rêxistinkirin û hevgirtina xwe mezin bikin û tundiya di asta qirkirinê de li jinê tê kirin, rawestînin.
Komelgeha Jinên Azad a Rojhilatê Kurdistanê-KJAR’ê bi wesîleya 25’ê Mijdarê Roja Têkoşînê ya Navneteweyî ya li dijî Tundiya li Jinê daxuyaniyek da.
Daxuyaniya KJAR’ê bi vî rengî ye:
“Pirsgirêka azadiya jinê pirsgirêkeke ku li hemû erdnîgariyan heye.
Şerê cîhanê yê sêyemîn wekî şerê paradîgmayan e.
Yek ji sedema ku gelên dinyayê di asta cîhanî de li şoreşa jinê ya ‘Jin, Jiyan, Azadî’ xwedî derdikevin, hişmendiya şerê paradîgmayê ye.
Serhildanên ku di sala 2022’an de bi pêşengtiya jinan, li Rojhilatê Kurdistan û Îranê pêş ketin asta radîkalbûna têkoşîna jinan li dijî pergala mêr-dewlet dide diyarkirin.
Di Îranê de êrişên mêrsalarî di asta herî jor de li ser jinan tê meşandin. ”
“Di 2 salên dawî de 156 jin li Îranê bi destê zilam hatin kuştin”
KJAR’ê diyar kir ku dewleta Îranê bi her şêwazî pêşengên şoreşê dike armanc û wiha domand:
” Salekî ku tekoşîna jinan gihîşte asta herî jor, êrîşên mêrê zayendperset jî bi dehan jin kirin qurbanî.
Li gorî amarên ku li Îranê tên tomarkirin di 2 salan de 156 jin bi destê bav û zilamê malê hatine kuştin.
Lê li gorî lêkolînên zanîngehan her salê bi qasî 375- 450 jin tên kuştin.
Mêrên kujer jî ji aliyê pergala dewletê ve weke parêzvanê namûsê tên pênasekirin.”
KJAR: Têkoşîna azadiyê ya jinê garantiya azadî û demokrasiyê ye
KJAR herî dawî ew bang ji bo jinan kir û got;
“Li derveyî pergala mêr -dewletê, em pergala xwe ya xweser rêxistin bikin.
Weke jinên Kurd, Belûç, Ereb, Fars, Azerî, Gîlekî û hwd. em berpirsiyarinê deskeftiyên şoreşêne.
Divê yek ji rojevên me yên sereke yê şoreşa jinê xweparastin be.
Em bi têkoşîna xwe li ber jiyan û azadiya her girtiyekî siyasî de berpirsyarin.
Weke KJAR, em dibêjin ku em ê bi pergala xweparastinê, rêxistinkirin û hevgirtina xwe mezin bikin û tundiya di asta qirkirina ser jinê de rawestînin.
Em ê bi ruhê felsefeya ‘Jin, Jiyan, Azadî’ re hemû qadên jiyanê veguherînin qadên têkoşîn û azadiyê.”
