Bi navbeynkariya Misir û Qatarê di navbera Îsraîl û Hemasê de ji bo agirbestê lihevkirina ku dihat payîn pêk hat.
Rayedarên aliyan diyarkirin di nava 24 saetan de agirbest were ragihandin.
Li aliyek din jî dîsa êrîşên Îsraîlê li Şerîda Xezayê pêk hat û herî kêm 100 sivîl hat kuştin.
Her wiha Rêxistina Tenduristiyê ya Cîhanî (WHO) jî daxuyaniyek parve kir û got: “Li Şerîda Xezayê li hemberî saziyên tibbî 178 êrîş pêk hatine.”
Di navbera Îsraîl û Hemasê de ji bo agirbesta demkurtî lihevkirin pêk hat.
Li gorî lihevkirinê her du alî 4 rojan êrîş û pevçûnan rawestînin.
Di lihevkirinê de mijara sereke serbestberdana dîl û girtiyên di destê her du aliyan e.
Îsraîl: Ji bo her 10 dîlên serbest werin berdan wê agirbest rojek din were dirêjkirin
Daxuyaniya ku li ofîsa Serokwezîrê Îsraîlê Benyamin Netanyahu hat dayîn, hat destnîşan kirin ku 50 dîlên serbest werin berdan ji zarok û jinan pêk tê.
Di daxuyaniya Îsraîlê de hat îfadekirin li ser lihevkirinê ji bo her 10 dîlên din serbest werin berdan wê agirbest rojek din were dirêjkirin.
Lê belê Îsraîlê derbarê hejmara girtiyên Filîstînî de ku serbest werin berdan agahî neda.
Hemas: Wê li beramberî 50 Îsraîlî 150 Filîstînî were berdan
Hemasê di daxuyaniyê xwe yê nivîskî de destnîşan kir ku encama danûstandinan yê bi navbeynkariya Qeter û Misirê bi Îsraîlê re agirbestekî demkurtî hat îlankirin.
Her wiha di daxuyaniya Hemasê de li gorî lihevkirinê li beramberî 50 girtiyê Îsraîlî wê 150 Fîlîstînî serbest werin berdan.
Pêvajoya agirbesta 4 rojan pêdîviyên alikariya mirovî û bi sedan wesayîtên sotemenî hildigirin wê beyî cudahiya bakur û başûrê heremê derbasî Şerîdê Xezayê bibin.
Li gorî Îsraîlê li Şerîda Xezayê di destê Tugayên Îzeddîn el-Qesam ê baskê çekdarî ya Hemasê de 239 girtiyê Îsraîlê heye.
Beriya agirbestê êrîşên Îsraîlê
Îsraîl beriya agirbestê jî li Xezayê êrîş pêk anî.
Çavkaniyên Fîlîstînî îro dan xuyakirin di êrişên domdar a Îsraîlê de hejmarek zêde Fîlîstinî hatine kuştin.
Çavkaniyan ragihandin artêşa Îsraîlê bi şev cihên cûda li Şerîda Xezayê êrîşî malên sivîlan kirine û di van êrîşan de herî kêm 100 Fîlîstinî hatine kuştin.
WHO: Li şerîda Xezayê li hemberî saziyên tibbî 178 êrîş pêk hatiye
Rêxistina Tenduristiyê ya Cîhanî (WHO) daxuyaniyek parve kir.
Di daxuyaniyê de hat gotin li Şerîda Xezeyê 178 êrîşên ku li hemberî saziyên tibbî hatiye kirin 553 kes miriye û 696 kes jî birîndar bûye.
Her wiha WHO di platforma medya civakî X’ê de bang li agirbestê kir û wiha got:
“Bi lez pêdivî alîkariya mirovî heye. Divê demildest saziyên tenduristiyê werin parastin.”
Di navbera Îsraîl û Hemasê de ji bo 4 rojan agirbest hat ragihandin
