Li paytexta Îrlanda Dublin piştî êrişa bi kêra rewş aloz bû.
Piştî îdiaya ku êrişkar kesek biyanî ye, rastgirên tund daketin qadan.
Di navbera polîs û xwepêşandêran de, şer û pevçûn derket.
Ev der paytexta Îrlanda Dublin e.
Piştî êrîşa bi kêran a li vir ku tê îdiakirin kesek biyanî pêk aniye, xwepêşanderên ku piraniya wan rastgirên tund û neteweperest in, daketin kolanan.
Li gorî nûçeya kanala giştî ya Îrlandayê RTE, di xwepêşandanên ku piştî nîvê şevê dest pê kirin de, polîsan ji bo aramiyê li bajêr biparêzin operasyonek mezin li dar xistin.
Vîdyoya ku di saetên serê pêncşemê de li ser medyaya civakî hat weşandin jî nîşan dide ku komek bi tundî bi hêzên ewlehiyê re li Dublinê şer dikin.
Her wiha şewitandina wesayîtên polîsan jî rewşa li herêmê nîşan dide.
Li Dublinê dijberiya koçberan
Wekî din, di hin vîdyoyan de, xwepêşandêrên ku tê texmîn kirin rastgirên tundrew in, têne bihîstin ku dirûşmên li dijî koçberan ên wekî “Wan bavêjin” gotin.
Polîs bûyer wekî “xebata komeke bi tevahî dîn a holîganan ku ji hêla îdeolojiya rastgira tund ve têne rêve kirin” destnîşan dikin.
Di bûyera bi kêrê ya ku duh li Dublinê li nêzî dibistanekê pêk hat de 3 jê zarok 5 kes birîndar bûn.
Şefê Polîsê Dublin: Di êrişan de çalakiyek terorî tine ye
Şefê Polîsê Dublin Liam Geraghty ji rojnamevanan re axivî û wiha got:
“Em piştrast dikin ku di wan êrîşan de “çalakiya terorê” tune ye.
Xuya ye ku ev êrîşek serbixwe ye û divê em sedema wê diyar bikin.”
Her wiha pîrozbahî li kesên ku mudaxeleyî êrîşkar kirin jî kir.
Geraghty anî ziman ku polîs bi malbatên zarokan re di têkiliyê de ne.
