Ti nîşaneyên agirbestek wê navbera Îsraîl û Hemasê were ragihandin tineye.
Ji ber ku alî tenê qala şer û çekên tên bikaranîn dike.
Jimara Filistîniyên hatîn kuştin, 18 hezar û 200 derbas kir.
NY jî ragihand ku ew li ser karanîna çekên fosforê ya li herêmê lêkolîn dikin.
Êrîşên Îsraîlê yên ji 7’ê Cotmehê ve li ser Xezayê didomin.
Li gorî daneyên Wezareta Tenduristiyê ya li Xezayê, di êrîşên ku nexweşxane û saziyên perwerdeyê jî tên hedefgirtin de, hejmara kesên jiyana xwe ji dest dane bû 18 hezar û 205.
Ji kesên jiyana xwe ji dest dane herî kêm 7 hezar û 700 jê zarok û 5 hezar û 150 jî jin in.
Tê diyarkirin ku di bin xirbeyan de bi hezaran cenaze hene.
Arteşa Îsraîlê ku li ser bajaroka Cibaliya ya li bakûrê Xezaye û bajarê Xan Yûnûs ê li başûrê Xezayê bi topan giranî êrîşan pêk tîne, li dijî Refahê yê li başûrê Xezayê jî êrîşa hewayî pêk anî.
Li gorî agahiyên ajansa nûçeyan a Filistînê WAFA’yê; di êrîşê de 6 jê zarok 12 kes hatin kuştin.
Hat diyarkirin ku di êrîşê de gelek kes jî birîndar bûne.
Nexweşxaneya Kemal Advan hat dorpêçkirin
Di daxuyaniya ji aliyê Wezareta Tenduristiyê ya Xezayê ve hat dayîn de, hat diyarkirin ku Îsraîlê Nexweşxaneya Kemal Advan a li Beyt Lahiyayê dorpêç kiriye.
NY: Fosfora Spî rê li ber şewatên gelek xirab vedike
Li aliyê din li gorî daxuyaniya ku hat dayîn Îsraîlê di êrîşa li hemberî Xezayê de bombeya fosfora spî bi kar aniye.
Berdevkê NY Stemphane Dujarric da zanîn ku belgeyên aşkere yên ku nîşan didin Îsraîlê fosfora spî bi kar aniye tune ne û got:
“Ev malzemeyek din ku agir derdixe, em bi fikar in ku bi taybetî li herêmên şêniya wan zêde ye were bikaranîn.
Fosfora spî dema ku weke çek neyê bikaranîn jî rê li ber şewatên gelek xirab vedike.”
DYA: Em li ser bikaranîna fosfora Spî lêkolîn dikin
Li aliyê din Berdevkê Wezîrê Karê Derve yê DYA’yê Matthew Mîllerli ser heman mijarê di daxuyaniya çepemeniyê de diyar kir ku ev ji bo armancên leşkerî tê bikaranîn, lê belê ji bo ziyana wê ya li hemberî sivîlan kêm bibe tişta ji destê wan tê wê bikin.
Artêşa Îsraîlê: Bombayên me yên dukelê hene
Piştî daxuyaniya DYA’yê Îsraîlê di radyoya xwe ya artêşê de derbarê ‘fosfora spî’ de daxuyanî da.
Di daxuyaniyê de wiha hat gotin: “Bombeyên me yên dukel ên ku fosfora spî digre nava xwe, bi awayek kamuflaş hatine çêkirin.”
