Dewleta Tirkiyê a dagirker ku li pêşberî berxwedana gerîla nikare encamê bigre li pey planên dagirkerî û qirkirinê yên nû ye.
Di vê çarçoveyê de rayedarên Tirkiyê du meh in li ser rêya Iraqê diçin û tên.
Dewleta Tirkiyê ku di şerê li dijî gerîla de bi her awayî piştgiriya PDK’ê digire dixwaze Iraqê jî bike şirîkê xwe.
Di vê çarçoveyê de di serdanên li Iraqê de ji hevdîtinan zêdetir zext li Iraqê tên kirin.
Dewleta Tirk a dagirker ku ji sala 2022’an ve êrişên xwe yên dagirkeriyê yên li dijî Başûrê Kurdistanê derxistiye asta jor, niha jî li pey planên nû ye.
Dewleta dagirker ku di şerê li dijî gerîlayan de xitimiye û windahiyên mezin dide hewl dide dewleta Iraqê jî bike şirîkê xwe yên êrişên nû.
Ji ber vê yekê ji meha Kanûnê ya sala 2023’an ve rayedarên Tirkiyê ketine nava tevgerê.
Ji aliyekî rayedarên desthilatê, ji aliyekî serokê îstixbaratê û ji aliyekî jî fermandarên artêşê li ser rêya Iraqê diçin û tên.
Rayedarên Tirkiyê du meh in li ser rêya Iraqê diçin û tên
Di nava du mehan de, Wezîrê Karên Derve Hakan Fîdan, Serokê MÎT’ê Îbrahîm Kalin û Wezîrê Parastinê Yaşar Guler û Fermandarê artêşê serdana Iraqê kirin û bi rayedarên vî welatî û rêveberên PDK’ê re rêze hevdîtin pêk anîn.
Encamên rastî yên van hevdîtinan nehatin eşkere kirin lê di çarçoveya van hevdîtinan de dixwazin Iraqê jî bikin beşeke ji siyaseta xwe ya qirkirina Kurdan.
Dewleta Tirk a dagirker ku di şerê li dijî gerîlayan de bi her awayî piştgiriyê ji PDK’ê distîne, tevî Iraqê hewl dide Îran û YNK’ê jî tevlî vê plana dagirkerî û qirkirinê ya nû bike.
Xuyaye ji bo vê yekê pêk bîne wê serî li hemû rê û rêbazan bide û hewl bide bazariyên qirêj bike.
Dewleta Tirk ji hevdîtinan zêdetir zextê li Iraqê dike
Beriya demekê wezîrê karê derve Hakan Fîdan gef li YNK’ê xwar û diyar kir ger ew li dijî PKK’ê tedbîran negirin Tirkiye wê gavên pêwîst bavêje.
Xuyaye di serdanên rayedarên dewleta Tirk yên Iraqê de ji hevdîtinan zêdetir zext li dewleta Iraqê tê kirin ku li gorî plana qirkirinê ya ew ferz dikin, bikeve nava tevgerê.
Dewleta Iraqê ku li dijî êrişên dagirkeriyê yên Tirkiyê ên li ser serweriya xaka xwe timî fikarên xwe tîne ziman lê di meriyetê de heta niha ti gav neavêtiye.
Hevdîtinên ku rayaderên Tirkiyê li Bexdayê dikin wê rê li ber encameke çawa veke, di roj an jî demên pêş de wê diyar bibe.
