Tevî bîryara agirbestê ya Konseya Ewlekariyê ya NY jî şerê li Xezayê nasekine.
Hemasê ragihand di êrişên Îsraîlê de 62 kesên din hatin kuştin.
Ji bo hevdîtinên derbarê operasyona li dijî Refahê de jî, wê Îsraîl şandeyekê bişîne Amerîkayê.
Tevî niqaşên li ser pêkanîna agirbestê jî şerê li Xezayê ranawest e.
Ji duh heta îro li gelek deverên bajêr şer û êrişên giran qewimîn.
Wezareta Tenduristiyê ya Hemasê di roja 174’an de bîlançoya dawî ya şer eşkere kir.
Li gorî daxuyaniya wezaretê di nava 24 seetên dawiyê de 62 kesên din hatin kuştin, 91 kes jî birîndar bûn.
Hat ragihandin hejmara kesên li Xezayê di êrişên Îsraîlê de hatin kuştin derket 32 hezar 552’an ya birîndaran jî bû 74 hezar 980.
UNRWA: Di şerê li Xezayê de 13 hezar û 750 zarok mirin
Saziya Alîkariyê ya ji bo penaberên Filistînê (UNRWA) jî derbarê şerê li Xezayê de raporek weşand.
Di raporê de tê diyarkirin di şerê li Xezayê de ji 7’ê Cotmeha 2023’an ve 13 hezar 750 zarok di êrişên Îsraîlê de hatine kuştin.
25’ê vê mehê cara ewil li Konseya Ewlekariyê ya Neteweyên Yekbuyî pêşnûme-biryara ji bo agirbesteke lezgîn hate erêkirin.
Di pêşnûme-biryarê de, daxwaz hate kirin ku di meha remezanê de, li Xezayê agirbest pêk were û ev agirbest mayînde bibe.
Lê heta niha jî ev bîryar neketiye meriyetê û şerê li Xezayê bi dijwarî didome.
NY: Îsraîl li Xezayê qirkirinê dike
Li aliyê din Neteweyên Yekbuyî ragihand ku Îsraîl li Xezayê li dijî Filistîniyan qirkirinê dike.
Raportora Taybet ya Neteweyên Yekbuyî Francesca Albanese ku rapor amadekiriye derbarê mijarê li avahiya NY ya li Cenevê daxuyaniya çapemeniyê da.
Albanese diyar kir ji ber amadekirina raporê gef lê hatine xwarin. Lê derbarê asta gefan û ji aliyê kî de tên kirin de agahî neda.
Wezareta Karên Derve ya Amerîkayê jî ev yek red kir û ragihand Îsraîl qirkirin pêk neaniye.
Berdevkê Wezaretê Matthew Miller ku di daxuyaniya rojane ya çapemeniyê de axivî, diyar kir ew rapora têkildarî mijarê qebûl nakin.
Îsraîl derbarê operasyona li dijî Refahê de wê şandeyekê bişîne Amerîkayê
Qesra Spî ya Amerîkayê jî ragihand, Serokwezîrê Îsraîlê Binyamîn Netanyahû derbarê hevdîtinên li ser operasyona li dijî Refahê de şandina şandeyekê ji bo Amerîkayê qebûl kiriye.
Berdevka Qesra Spî Karine Jean Pierre di civîna çapemeniyê de, li ser mijarê axivî û got:
“Ofîsa Netanyahû serdana şandeyê qebûl kiriye û ji bo diyarkirina dîroka wê di navbera Îsraîl û Amerîkayê de, hevdîtinan destpêkiriye.”
Şîrovekarê siyasî yê Misrî Îlham El-Milîcî derbarê şerê Xezayê de axivî
