Di şerê Xezayê de ku 172 roje didome, 81 kesên din hatin kuştin.
Duh cara ewil li Konseya Ewlekariyê ya NY pêşnûme-bîryara agirbestê ya ji bo Xezayê hate erêkirin.
Di serî de Hemas gelek aliyan bîryar bi kêfxweşî pêşwazî kirin û banga pêkanîna agirbestê kirin.
Şerê li Xezayê her diçe dijwar dibe.
Di roja 172’an de, li gelek deverên bajêr şer û êrişên giran pêk hatin.
Li gorî dezgehên ragihandinê yên Filistînê di êrişa Îsraîlê ya li dijî herêma Refahê de, herî kêm 15 kes mirin û bi dehan kes jî birîndar bûn.
Wezareta Tenduristiyê ya Hemasê jî bîlançoya şer ya dawî eşkere kir.
Li gorî daxuyaniya wezaretê, di nava 24 seetên dawiyê de 81 kesên din di êrişên Îsraîlê de hatin kuştin û 93 kes jî birîndar bûn.
Ji 7’ê Cotmeha 2023’an heta niha hejmara kesên li Xezayê hatin kuştin derket 32 hezar 414’an ya birîndaran jî bû 74 hezar 787.
Li Konseya Ewlekariyê ya NY pêşnûmeya agirbestê hate erê kirin
Di asta navnetewî de ji bo pêkanîna agirbestê ya li Xezayê civîn tên lidarxistin û biryar tên girtin, lê heta niha di vê mijarê de encam nehatiye girtin.
Duh careke din li Konseya Ewlekariyê ya Neteweyên Yekbuyî pêşnûme biryara ji bo agirbesteke lezgîn hate erêkirin.
Di pêşnûme-biryarê de, daxwaz tê kirin ku di meha remezanê de li Xezayê agirbest pêk were û ev agirbest mayînde bibe.
Her wiha di pêşnûmeyê de daxwaza berdana dîl-girtiyên di destê Hemasê de jî tê kirin.
Di dengdana pêşnûmeyê de Amerîka bê alî ma û 14 welatan jî dengê erê dan.
Bi vî awayî ji 7’ê Cotmeha 2023’an ve, cara ewile ku li Konseya Ewlekariyê pêşnûmeyek ji bo agirbesta li Xezayê tê qebûl kirin.
Serdana Netanyahû ya ji bo waşhîngtonê hate betalkirin
Li aliyê din li dijî erêkirina pêşnûmeyê gelek bertekên erênî û neyînî hatin nîşandan.
Ji ber ku di dengdana pêşnûmeyê de bê alî maye, Îsraîlê nerazîbûn nîşanî Amerîkayê da.
Ji ber vê yekê şandeya ku dihat payîn derbarê operasyona li dijî Refahê de serdana Washingtonê bike, betal kir.
Di daxuyaniya Ofîsa Serokwezîr Binyamîn Netanyahû ya derbarê mijarê de hate gotin,
“Astengkirina pêşnûmeyê ji aliyê Washingtonê ve tê wateya ku ji pozîsyona xwe ya berê gav bi paşde avêtiye. Ev yek wê ziyanê bide şerê li dijî Hemasê û berdana 130 dîl-girtiyên li Xezayê.”
Hemasê bîryar bi kêfxweşî pêşwazî kir
Hemasê jî bîryar bi kêfwweşî pêşwazî kir.
Di daxuyaniya Hemasê ya derbarê mijarê de hate gotin,
“Em ji ber bîryara Konseya Ewlekariyê ya NY ya derbarê pêkanîna agirbestê ya li Xezayê kêfxweşin.
Em amade ne, bi Îsraîlê re dîl-girtiyan bi hev biguherin. Ji bo pêkanîna bîryarê divê civaka navnetewî zextê li Îsraîlê bike.”
Erebistan, Yekîtiya Ewropa û Rûsyayê bîryar erênî pêşwazîkirin
Gelek dewlet û rêxistinan jî, bîryara Konseya Ewlekariyê erênî pêşwazî kirin.
Erebistana Siûdî, Yekîtiya Ewropa, Rûsya, Rêxistina Tenduristiyê ya Cîhanê xwestin bîryar bê bi cih anîn û tavilê agirbest pêk were.
