Ji ber îtîraza AKP’ê li dijî du sindoqan, li Curnê Reş biryar hate dayîn ku hilbijartin ji nû ve bê lidarxistin.
Ev biryara Lijneya Hilbijartinê ji aliyê gelê Rihayê û DEM Partiyê ve hate protesto kirin.
Bajareke din a ku desthilata AKP’ê li wir dek û dolab kiriye Bedlîse.
Di hilbijartinên Bedlîsê de 2 hezar û 18 dengên DEM Partiyê nederbasdar hatin hesibandin.
Lewma DEM Partiyê ji bo deng jinûve bên hejmartin serî li Lijneya Hilbijartinê da.
Di hilbijartina xwecîhî yên li Bakurê Kurdistanê de li pişt her sindoqeke dengdanê dek û dolabên desthilata AKP’ê derdikeve.
DEM Partiyê piştî 45 salan, Şaredariya Curnê Reş a Rihayê bi ferqeka 521 dengan bi dest xist.
Wê hilbijatina Curnê Reş ji nû ve bê lidarxistin
Lê ji ber îtîraza AKP’ê ya ji bo 15 sindoqan, duh biryar hate dayîn ku hilbijartin careke din bê lidarxistin.
Balkêşe ku ew sindoqên AKP’e ji bo wê îtraz dike ji aliyê biraziyê namzetê AKP’ê Alî Aslan Bayik ve hate şewitandin.
Lê tevî vê jî Lijneya Hilbijartinê bûyera ku ji aliyê AKP’ê ve hatiye kirin ji nedîtîve hat û biryar da ku hilbijatin ji nû ve bê lidarixstin.
Lijneyê diyar kir ku wê hilbijartin di 2’yê hezîranê de were lidarxistin.
Li Curnê Reş bertekên li dijî dubare li dar xistina hilbijartinê didome
Li dijî vê biryarê gelê Rihayê li pêşiya avahiya Lijneya Hilbijartinê ya Bajar a li navçeya Halîliliyeyê kom bûn û biryar protesto kirin.
Her wiha parlamenterê DEM Partiyê yê Rihayê Omer Ocalan û gelek parlementer û hevşaredarên DEM Partiyê jî di çalakiyê de amade bûn.
Beşdarên çalakiyê diyar kirin ku ew îradeya xwe teslîmî desthilatê nakin.
Desthilata AKP’ê li Bedlîsê jî hîle kiriye
Bajareke din a ku desthilata AKP-MHP’ê li wir dek û dolab kirine Bedlîse.
Di hilbijartinê de bi hezaran leşker û polîs weke “hilbijêr” lê hatine veguhestin.
AKP’ê 8 hezar û 900 û DEM Partiyê jî 8 hezar û 702 deng stand.
Di encamê de 188 deng ferq derket.
Di heman demê de 2 hezar û 18 dengên DEM Partiyê nederbasdar hatin hesibandin.
Îtîraza têkildarî Bedlîsê hêj biencam nebûye
Ji bo deng jinûve bên hejmartin, DEM Partiyê serî li Lijneya Hilbijartinê ya Navçeya Navendî da lê ev îtîraz hate redkirin.
Li ser vê yekê jî duh serî li Lijneya Hilbijartinê ya Bajar da.
Heta niha jî Lijneya Hilbijartinê ya Bajar biryara xwe eşkere nekiriye.
Ceylan Akça: Polîsan çûyîna me ya edliyê asteng kirin
Parlamentera DEM Partiyê ya Amedê Ceylan Akça têkildarî serlêdanan axivî û got:
“Me xwest biçin edliyeyê, lê polîsan gotin ku wê destûr nedin em biçin edliyeyê û piştre jî êrîşî me kirin.”
