Şêniyên Hesekê ji ber birîna avê ji aliyê dewleta Tirk a dagirker ve, ketine nava tengasiyeke mezin.
Tevî ku Rêveberiya Xweseriya Demokratîk gelek hewl dide pêdiviyên şêniyên bajêr ên avê peyda bike, lê şênî zehmetiyan dikişînin.
Wekî her sal bi hatina havînê re, aloziya avê li bajarê Hesekê dîsa dubare dibe.
Ji ber ku dewleta Tirk ji 2019’an ve an ku ji dema bajarê Serêkaniyê dagir kiriye, av ji ser bajêr qutkiriye.
Tevî ku Rêveberiya Xweseriya Demokratîk gelek hewl dide pêdiviyên şêniyên bajêr ên avê peyda bike û ji bo wê 60 sahrîc veqetandine û li kolanan depo danîne, lê şênî zehmetiyan dikişînin.
Ji ber ku pêdiviya bajêr rojane bi zêdetirî 130 hezar metrekab avê heye.
Desteya Rêveberiya Herêmî ya herêma Bakur û Rojhilatê Sûriyê ji bo çareserkirina vê pirsgirêkê Tebaxa 2023’yan dest bi projeyekê kir ji bo ku avê ji bajarê Amûdê bigihîne bajarê Hesekê.
Di projeyê de wê 20 bîr bên kolandin.
Dûre bi rêya boriyan bi dirêjahiya 62 kîlometreyan, avê bikişîne bajêr.
Ev proje dê li 4 qonaxan pêk were.
Li rex vê projeyê, projeyeke din da destpêkirin ku avê ji Firatê bigihîne Hesekê.
“Ji bo avê bi dest bixin ji derengiya şevê ve dikevin dorê”
Şêniyê bi navê Ebdullah Ceydeh têkildarî zehmetiyên ku ji bo peydakirina avê dikişînin, got:
“Ji ber ku hejmara şêniyan li bajêr zêde ye û bi hatina havînê re, êdî depoyên ku rêxistinan li kolanan û taxan danîne, têrê nakin.
Pirsgirêkeke din heye, kirîna avê ji sahrîcan bihatir bûye.
Ev bi xwe zehmetiyeke mezin e.
Her kes ji şevê ve galonên xwe dikin dorê ji bo ku roja din avê zû bi dest bixin.”
Şêniya bi navê Munîfe Hemze jî behsa êş û zehmetiyên xwe ji bo peydakirina avê kir û got:
“Ji 2019’an ve, rewşa me wisa ye.
Em ava vexwarinê ji depoyên li kolanan peyda dikin.
Lê ava ji bo şûştina firax û cil û bergan ji bîran peyda dikin.
Heta bikarim 2 galonên av bi dest bixin, gelek saetan di dorê de dimînim.”
Gerînendetiya Avê ya Hesekê Tîrmeha 2023’yan daxuyaniyek dabû û ragihandibû ku dewleta Tirk a dagirker Hesekê kiriye herêmeke karesatê û bang li rêxistinên têkildar kiribû ku vê karesatê çareser bike.
