Şîrovekarekî siyasî yê Sûrî Ehmed El Durzî diyar kir ku diyaloga di navbera Rêveberiya Xweser û hikumeta Şamê de dê helwesta Şamê li hember dewleta Tirk a dagirker xurttir bike û got:
“Lihevkirina di navbera Qamişlo û Şamê de ji bo pêkanîna aramiyê girîng e.
Rêveberiya Xweser jî gelek caran ragihandibû ku ew ji bo diyaloga bi Şamê re amade ye, lê Şamê tu gavên erênî ji bo vê yekê neavêtin.”
Axavtinên li ser hewldanên dewleta Tirk a dagirker ên nêzîkbûna bi hikumeta Şamê didomin.
Beşar Esed destnîşan kiribû ku ew ji bo diyaloga bi dewleta Tirk a dagirker re bi merca ku ew ji axa Sûriyê derkeve, amade ye.
Lê tevî wê jî, berî nêzî 2 hefteyan Wezareta Karên Derve ya Sûriyê teqezî bi girîngiya vekişîna artêşa Tirk a dagirker ji axa Sûriyê da.
Ev merc jî ji aliyê Beşar Esed ve bi rêya dezgehên çapemeniyê hat teqezkirin.
Nivîskar û şîrovekarê Sûrî Ehmed El Durzî derbarê vê yekê de axivî.
Ehmed El Durzî diyar kir ku dewleta Tirk a dagirker ji tu deveran venekişiyaye û hîn jî Serêkaniyê, Girê Spî, Efrîn, Cerablis, Bab, Ezaz û Idlib dagir kiriye û got:
“Dewleta tirk bi awayekî bê navber li dijî axa Sûriyê êrîşan pêk tîne. Hikumeta Şamê hewl dide ji daxwaza dewleta Tirk a dagirker a nêzîkbûnê sûd wergire da ku pirsgirêkên xwe çareser bike. Nexasim ku Rûsyayê teqezî bi girîngiya nêzîkbûna Enqereyê ji Şamê kir.”
“Diyaloga di navbera Rêveberiya Xweser û Şamê de dê helwesta li dijî dagirkeriyê xurtir bike”
El Durzî da zanîn ku diyaloga di navbera Rêveberiya Xweser û hikumeta Şamê de dê helwesta Şamê ya li hemberî dagirkeriya Tirk xurttir bike û wiha domand:
“Çareseriya di navbera Qamişlo û Şamê de ji bo pêkanîna aramiyê girîng e. Rêveberiya Xweser jî gelek caran ragihandibû ku ew ji bo diyaloga bi Şamê re amade ye, lê Şamê tu gavên erênî ji bo vê yekê neavêtin.”
“Tirkiyê naxwaze mercên hikûmeta Şamê pêk bîne”
Şîrovekarê Sûrî Ehmed El Durzî da zanîn ku rastiya aloziya Sûriyê bi aliyên navdewletî û herêmî ve girêdayî ye û wiha pê de çû:
“Şam hewl dide alozî û pirsgirêkên herêmî û navneteweyî yên di Sûriyê de çareser bike, ji ber ku piştî çareserkirina wan, pirsgirêkên hundirîn dê bi awayekî xweber çareser bibin.
Ji bo vegerîna têkiliyên di navber Şam û Enqereyê de divê bi serweriya dewleta Sûriyê ya li seranserî axa wê were îtîrafkirin, Tikriyê êdî destwerdanê di karûbarên hundirîn de neke, komên terorîst ên girêdayî tikriyê werin helandin.
Tirkiyê jî naxwaze van mercan pêk bîne.”
“Ji bo Sûriyê însiyatîfa Rêveberiya Xweser vebijêrka herî guncaw e”
