Jinên koçber ên î li kampa Til El-Semin di gelek zehmetiyên jiyanî re derbas dibin. Tevî vê jî dîsa li ber xwe didin û hêviya wan vegera li ser axa xwe ne.
Dewleta Tirk di 9’ê Cotmeha 2019’an de êrîşî bajarê Girê Spî û Serêkaniyê kir û di encam de her du bajar hatin dagirkirin.
Gelek kiryarên dermirovî û binpêkirin li dijî gel hatin kirin ji ber wê ew neçar man koçber bibin.
Kampa Til El Semin di sala 2019’an de hat avakirin û koçberên Girê Spî di nav xwe de dihewîne.
Zêdetirî 6 hezar û 600 kesên bi darê zorê koçber bûne lê dimînin.
Tevî 5 sal di ser dagirkirina bajarê Girê Spî re derbas dibin jî lê hîna êş û azarên koçberan bidawî nebûne.
Meha Weys ya 38 salî ji bajarê Silûk a bajarê Girê Spî ya dagirkirî ye derbarê rewşa li kampê jiyan dikin wiha anî ziman:
“Em bi sedema dewleta Tirk a dagirker ji malên xwe koçber bûn. Dewleta Tirk mal û milkên me talan kir.
Em heta niha li kampan li ber xwe didin. Em di rewşên gelekî zehmet de ne.
Rêxistinên mirovî alîkariya me nakin. Ev yek azarên me zêdetir dike.”
Cewahir Îsa jî yek ji wan jinan e ku bi darê zorê hatiye koçberkirin da zanîn ku ew jî mîna her koçberekî di vê kampê de azaran dikşîne û wiha got:
“Ne zivistana me zivistan e û ne jî havîna me havîn e.”
Zaroka bi navê Hela Mihemed ya 14 salî ji bajarê Girê Spî ye da zanîn ku ew ji mafê xwe yê xwendinê bêpar hatine hiştin û wiha dewam kir:
“Em weke zarok dixwazin mafên me yê xwendinê hebe. Hêviya me vegera ser axa me ye”.
Hevseroka kampa Til El Semin Ezîza Hesen jî derbarê rewşa koçberan de wiha anî ziman:
”Koçber taybet jî jin û zarok di rewşên zehmet re derbas dibin.Tevî ku xaleke tenduristî heye jî lê bijîjk tune ne.
Di kampê de di navbera 250-300 zarok hene piştî ku konek şewitî, 9 zarok birîndar bûn û 1 jê jiyana xwe ji dest da daxwaza wan a xwendinê jî nemaye.
Ev bûyer tirsek di dilê zarokan de çêkir.
Em hêvî dikin rêxistinên navneteweyî li rastiya kampa Til El Semin binerin û piştgiriya pêwîst pêşkêş bikin”.
