Li Şerîda Xezayê di 308 rojan de jî êrîş didomin.
Di êrîşa hewayî ya Îsraîlê de li Kampa Penaberan a Nuseyrat, Cibaliye û Magazî de herî kêm 8 kes hatin kuştin û gelek kes jî birîndar bûne.
Her wiha hat ragihandin ku heya niha 205 xebatkarên UNRWA’yê li Şerîda Xezayê mirine.
Di 308 rojên şerê Îsraîl û Hemasê de artêşa Îsraîlê li ser herêmên navend û bakurê Şerîda Xezayê êrîşa hewayî pêk anî.
Di vê êrîşê de herî kêm 8 sivîl mirin û gelek kes jî birîndar bûn.
Di nûçeya ku ji aliyê ajansa fermî ya Filistînê WAFA’yê ve hat weşandin de hat diyarkirin ku Îsraîlê malekî li Kampa Penaberan a Nusayrat a li navenda Şerîda Xezayê bombebaran kiriye.
Her wiha Kampa Penaberan a Magazi ya li Şerîda Xezayê jî di êrîşa hewayî de 3 kes mirin û gelek kes jî birîndar bûn.
Di nûçeyê de hat parvekirin ku balafirên şer ên Îsraîlê maleke li Kampa Penaberan a Cibaliya ya li bakurê Xezayê bombebaran kir û hat ragihandin ku di êrîşê de 3 kes mirine.
Di nûçeyê de hat diyarkirin ku bajarên Xan Yûnis û Refah ên li başûrê Şerîda Xezayê jî rastî êrîşên dijwar ên Îsraîlê hatin.
Hat destnîşankirin ku di êrîşên li ser herêmên Xan Yûnis û Refahê de kuştî û birîndar hene.
Li gor daxuyaniya Wezareta Tenduristiyê ya Filîstinê ji destpêka şer ve herî kêm 16 hezar û 314 zarok û 10 hezar û 980 jin hatin kuştin.
Li gor vê bîlançoyê hejmara miriyan derket 39 hezar û 699’an û ya birîndar jî derket 91 hezar û 722 kesan.
Ji destpêka şerê li Şerîda Xezayê de 205 xebatkarên Neteweyên Yekbûyî mirin
Li aliyê din di daxuyaniya ku ji aliyê UNRWA’yê ve hat dayîn de hat diyarkirin ku êrîşên artêşa Îsraîlê yên li ser Şerîda Xezayê bûne sedema mirina sivîlan, koçberkirina mecbûrî û zirara binesaziyê.
Di daxuyaniyê de hat destnîşankirin ku li Xezayê ji 10 kesan 9 kes ji cih û warên xwe bûn û hin kes ji carekê zêdetir, 10 caran jî koçber bûn.
Di daxuyaniyê de hat gotin ku ji ber ku 90 nexweşxane û navendên tenduristiyê li Xezayê nikarin xizmetê bidin pergala tenduristiyê bi zorê dixebitin.
Hat destnîşankirin ku 10 navendên tenduristiyê û 100 nuqteyên tenduristiyê yên gerok ên girêdayî UNRWA xizmetê didin.
Hat ragihandin ku heya niha 205 xebatkarên UNRWA’yê li Şerîda Xezayê mirine.
