Piştî ku Minbic 8 sal berê ji çeteyên DAIŞ’ê hat rizgarkirin, jinên ku di gelek qadên jiyanê de cih digirtin, bi Projeya Neteweya Demokratîk jiyanek demokratîk û azad ava kirin. Di navbera kontrolkirina çeteyên DAIŞ’ê û rizgarkirina bajêr de, jinên bajarê Minbicê yên Bakur û Rojhilatê Sûriyeyê pêşengiya şoreşa civakî kirin. Rola jinan a ku beriya hezaran salan ji dest wan hatibû girtin, piştî rojên reş û tarî bi xebatan şênber bû.
Dema çeteyên DAIŞ’ê Minbicê dagirkiribûn, jin di gelek şert û mercên zehmet re derbas dibûn û rastî kuştin, revandin, heqaret û destdirêyê dihatin.
Lê piştî rizgarkirina Minbicê jin ber bi pêşengiya civakê ve çû û di hemû qadan de cihê xwe girt.
Îro jî dayîkên Minbicê destnîşan kirin ku ew ê rê nedin dagirkeriya Tirk û çeteyên wê aramiya herêmê têk bikin.
Yek ji jinên Minbicê Aîşa Şêx Mihemed anî ziman ku ew ê rê nedin ku dagirkeriya Tirk aramiya herêmê têk bibe û bi hemû hêza xwe wê bajarê xwe biparêzin û got:
“Jinan bi saya Yekîneyên Parastina Jin û hêzên Meclîsa Leşkerî ya Minbicê xwe gihandin azadiyê ku ji wan re xewnek bû.
Ev der axa me ye û xwîna zarokên me li ser vê axê rijyaye, em ti carî terka axa xwe nakin.”
Meryem El Letûf ku ew jî yek jinên Minbicê ye diyar kir niha bi saya QSD’ê û YPJ’ê hemû pêkhate bi hezkirineke mezin bi hev re dijîn û ev yek anî ziman:
“Em weke dayikên Minbicê hazir in li hember êrîşên li ser axa xwe rahêjin çek û şer bikin.
Ji bo parastina bajarê xwe çe ji me bê xwestin em ê bikin.”
Endamên Mala Jin: Rola jina guhertinên mezin bi xwe re anîn
Li aliyekî din tevger û rêxistinên jinan li Minbicê ji bo çareserkirina dozên jinan xebat dikin û li dijî her cûre tundiya li dijî jinan têdikoşin.
Mala Jinê jî yek ji wan saziyane ku ji bo çareserkirina pirsgirêkên malbatê û bi taybetî pirsgirêkên jinên ku rastî tundiyê hatine, kar dike.
Endamên Mala Jin a Minbic û Gundewarên wê tevî êrîşên domdar li dijî herêmê li nêzî eniyên şer rêxistinbûna jinan didomînin.
Emîna Cera behsa destkeftiyên ku jinan piştî rizgarkirina Minbicê best xistine kir û got:
“Çeteyên DAIŞ’ê kiryarên herî hove li dijî jinan pêk anîn û wê ji hemû mafên wê bê par hiştin.
Piştî ku bi saya hêzên QSD’ê Minbic hat rizgarkirin rewşa jinan guherî û di hemû waran de gelek destkeftî bi dest xistin.
Jinan li dijî çeteyên herî xeternek di cîhanê de şerkirin û ew têk bikin.”
Renda Mihemed diyar kir ku jinên Minbicê îro li ser felsefeya Rêber Apo dimeşin û xwe bi rêxistin dikin û ev yek anî ziman:
“Asta jinê ji demê berê pir baştir bû ye.
Jinên ku berê ji malê dernediketin niha di hemû saziyan de cih digirin û roleke çalak dilîzin.
Divê hemû jin ti carî teslîm nebin û bi hêz û îrada xwe dikarin hemû mafên xwe bi dest bixin.”
