Îro 1’ê Mijdar roja cîhanî ya Kobanê ye.
1’ê Mijdarê, roja bîranîn û piştgiriya bi serkeftina bê hempa ya dîrokî ya gelê Kurde.
Di vê rojê de gelên cîhanî bûne yek û piştgiriya xwe ya bi Berxwedana Sedsalê ya Kobanê nîşan dan. Wê demê her kesî digot:
“Dilê cîhanê li Kobanê lê dide.”
Çeteyên DAIŞ yên ku bibûn kabûsa hemû mirovahiyê, yekem car bi destê keç û xortên Kurdan li Kobanê hatin binxistin.
Berxwedana Kobanê ji hemû cîhanê re bû hêz û îrade, Kobanê bû sembola berxwedana mirovahiyê.
10 sal di ser berxwedaniya ku rê neda xewn û xeyalên dewleta Tirk û Erdogan.
1’ê Mijdarê Roja Cîhanî ya Kobanê ye, roja bîranîn û piştgiriya bi serkeftina bê hempa ya dîrokî ya gelê Kurde.
Dilê cîhanê li Kobanê lê dide
Berxwedaniya ku li Kobanê hat nîşandan bala hemû cîhanê kişand ser xwe û fikra li beramberî Kurdan guherî.
Wê berxwedaniya dîrokî piştrast kir ku netewa Kurd ji bo vegerandina rûmeta mirovahiyê şer dike, ji bona wê di wê demê de her kesê digot:
‘Dilê cîhanê li Kobanê lê dide.’
Destpêka êrişê
Di 15’ê Îlona sala 2014’an de çeteyên DAIŞ’ê bi serokatiya Ebubekir Bexdadî dest bi êrişên li ser Kobanê û gundewarên wê kir.
Gelek çekên giran ên li Iraq û Sûriyeyê bi dest xistibûn, li hemberî Kobanê bi kar anîn.
Herwiha dewleta Tirk jî bi awayên cuda piştgirî dida çeteyên DAIŞ’ê.
Çeteyan nêzî 350 gundên Kobanê dagirkirin û piştre ketin Kobanê de.
Di 6’ê Cotmehê de bi hezaran çeteyên DAIŞ’ê xwe gihandin derdora Kobanê û bajar dorpêç kirin.
Bi hemû hêz û çekên giran hewl dan ku tevahiya Kobanê dagir bikin.
Ji aliyê din ve her çiqas hejmara şervanan kêm bû, lê dîsan berxwedanek bêhempa kirin û dest ji bajêr bernedan.
Bi lehengî li dijî DAIŞ’ê berxwedan û parastina bajêr kirin.
Hêviya hemû cîhanê berxwedana şervanên Kurd bû.
Ji bo piştgiriya şervanên Kurd li hemû bajarên cîhanê azadîxwaz û Kurd daketin qadan û piştgirî dan berxwedana Kobanê.
Lewma azadîxwazên cîhanê 1’ê Mijdarê weke Roja Cîhanî ya Piştgiriya Kobanê ragihandin.
1’ê Mijdar
1’ê Mijdara 2014’an wekî Roja Cîhanî ya Piştgiriya Kobanê hate îlankirin.
Di vê rojê de gelên cîhanî bûne yek û piştgiriya xwe ya bi Berxwedana Sedsalê ya Kobanê nîşan dan.
Herwiha 2’yê Mijdarê jî weke Roja Cîhanî ya Rojava hatiye ragihandin û cîhan ji bo parastina Rojava dakete qadan.
Banga seferberiyê ya Rêber Apo
Di dema berxwedanê de Rêber Apo di hevdîtina li gel şandeya Partiya Demokratîk a Gelan (HDP) de ji bo Kobanê banga seferberiyê kir.
Vê bangê berxwedaniya Kobanê xist qonaxekî nû de.
Bi sedan ciwanên Bakurê Kurdistanê sînor rakirin û xwe gihandin Rojavayê Kurdistanê.
Herwiha 150 pêşmergeyên Başûrê Kurdistanê bi biryara Parlamentoyê derbasî Kobanê bûn.
Di 26’ê Çileya 2015’an de piştî 134 rojên berxwendana bêhempa ya şervanên YPG’ê û YPJ’ê û HPG’ê YJA STAR’ê dildarên herçar parçeyên Kurdistanê û cîhanê, Kobanê hate rizgarkirin.
