Li Hesekê û Şedadê bi merasîman 2 şehîd hatin oxirkirin û 2 şehîd hatin bibîranîn.
Şervanê Yekîneyên Dîsîplîna Leşkerî şehîd Demhat (Ehmed El Umer) ku 26ˈê Kanûnê li Dêrazorê şehîd bûbû, îro bi merasîmekê li Pakrewangeha Şehîd Dijwar a li gundê Dawidiyê yê bajarê Hesekê hat oxirkirin.
Di merasîmê de şervanên Hêzên Komandos Ebdurehman El Rahil ê 7ˈê Kanûnê li Minbicê şehîd bûbû û 8ˈê Kanûnê li gundê Xirbe Temir ê Hesekê hatibû definkirin û şervanê Hêzên Komandos Ronî Welat (Ewad El Hisên) ê 25ˈê Kanûnê li Dêr Hafirê şehîd bûbû û 26ˈê Kanûnê li gundê Mexrûm ê Hesekê hatibû definkirin jî hatin bibîranîn.
Bi sedan şênî, nûnerên saziyên sivîl û leşkerî û ewlehî beşdarî merasîmê bûn ku ji aliyê Meclisa Malbatên Şehîdan a bajarê Hesekê ve hatibû lidarxistin.
Di merasîmê de endama Meclisa Malbatên Şehîdan Necah Hewas axivî û sersaxî ji malbatên şehîdan re xwest. Necah Hewas wiha got: “Rewşa ku herêma me tê re derbas dibe ne hêsan e.
Ji bo vê yekê jî divê tevahî pêkhateyên herêmê têkoşîn bikin.
Ji bo em pilanên dagirkeriyê yên dewleta Tirk têk bibin, divê em erka xwe pêk bînin û welatê xwe biparêzin.”
Ji fermandarên Meclisa Leşkerî ya Kantona Cizîrê Agirî Hesekê sersaxî ji malbatên şehîdan re xwest û got: “Şehîdên me ji bo parastina axa welat bê teredud canê xwe kir.
Dewleta Tirk a dagirker dest ji êrişên xwe bernedaye û her roj herêmên me dike armanca xwe.
Em tu carî dest ji axa xwe bernadin.
Em wek hêza leşkerî û QSD em ê her tim di çeperên şer de bin û li hember dagirkeriyê şer bikin.
Tu carî dewleta Tirk bi van êrişan nikare vîna gelê me û şervanên me têk bibe.”
Dûre endama Meclisa Malbatên Şehîdan Gulcîn Ehmê wesîqeyên şehîdan xwendin û radestî malbatên wan kirin.
Di dawiyê de girseyê cenazeyê şehîd Demhat spart axê.
Li bajarê Şedadê yê kantona Cizîrê jî cenazeyê şervanê QSDˈê Ebdullah Ebdulmecîn ku 26ˈê Kanûnê li Dêra Zorê şehîd bûbû, li Pakrewangeha Şehîdan hat definkirin.
Bi dehan şêniyên bajar, endamên saziyên sivîl û şervanên QSDˈê beşdarî merasîmê bûn.
Merasîmê bi rêzgirtinê dest pê kir û toraneke leşkerî ji aliyê şervanên QSDˈê ve hat lidarxistin.
Piştre endamê Komîteya Şopandinê ya Meclisa Malbatên Şehîdan a Şedadê Xelîl Mihemed axivî û sersaxî ji malbatên şehîdan re xwest û soza domandina xeta şehîdan da.
Ji fermandarên Meclisa Leşkerî ya Şedadê Cisûr Amûdê jî şehîdên şoreşa Bakur û Rojhilatê Sûriyê bi bîr anîn û got:
“Bila serê malbatên şehîdan û şervanan sax be. Şehîd Ebdullah yek ji hevalên me yên li eniyên şer bû.
Hêzên me ji bo jiyaneke azad û bi rûmet li dijî dewleta Tirk a faşîst şer dikin.”
Di dawiyê de wesîqeya şehadetê ya şehîd Ebdullah Ebdulmecîd hat xwendin û radestî malbata wî hat kirin. Cezayê şehîd bi dirûşmên “Şehîd namirin” hat veşartin.
