Li seranserî cîhanê li gel germahiya zêde baran, lêhî, şemîtîna axê jî rû didin.
Ji wan welatan Nîjerya û Hindistanê hefteyekî ji ber barana zêde bi lehiyê re rû bi rû dimînin.
Li gor daxuyaniyên rayedaran li Nîjeryayê 200 kes, li Hindistanê jî 32 kes jiyana xwe ji dest dan.
Li bajarê Mokwa yê Nîjeryayê, ji ber lehiyê herî kêm 200 kesî jiyana xwe ji dest dan.
Rayedarên xwecihî diyar kirin ku karên rizgarkirinê hatine rawestandin û hêviya rizgarkirinê nemaye.
Bobelatê sibeha Pêncşemê destpê kir.
Barana zêde ya li Mokwayê bariya, di nava pênc saetan de bû sedema lehiyê û gelek taxên bajêr di nava avê de hişt.
Bi bilindbûna avê re tenê banê xaniyan di ser avê de man û gelek kesan hewl dan xwe xilas bikin an jî cîranên xwe rizgar bikin.
Li gorî agahiyên ji yekîneyên rewşa lezgîn a Eyaleta Nîjerê di bûyerê de herî kêm 11 kes birîndar bûn, zêdeyî 3 hezar kes jî ji cih û warê xwe bûn.
Li gel zerara ku gihîşt 500 xaniyan, her wiha du rêyên bingehîn û du pir jî hilweşiyan.
Li vî welatî dema baranê her sal di navbera mehên Gulan û Îlonê de destpê dike û ji ber bandora krîza avhewayê bobelatên lehiyê rû didin.
Di sala 2024’an de li Nîjeryayê ji ber lehiyê zêdeyî hezar û 200 kesî jiyana xwe ji dest dan, 1.2 milyon mirov jî ji cih û warê xwe bûn.
Li Hindistanê karesata musonê: 32 kes mirin
Li aliyê din li bakur-rojhilatê Hindistanê di nava du rojên dawî de ji ber baranên muson lehî û şemîtîna axê pêk hatin.
Li gorî daxuyaniyên fermî, di karesatê de zêdeyî 32 kesan jiyana xwe ji dest dan.
Baranên muson her diçe tundtir dibin, lewma li seranserî herêmê çem tejî bûn.
Hat diyarkirin ku Çemê Brahmaputra yê ku ji Hîmalayan derdikeve herêmê derbas dike û digihije Bangladeşê, tejî bû û niştecihên derdor di bin avê de hiştiye.
Li herêmê li gelek nuqteyan hişyariya “alarma sor” hate îlankirin.
Artêşa Hindistanê destnîşan kir ku di operasyoneke mezin a li eyaleta Manîpur de, bi sedan kes hatin rizgarkirin.
