2 roj in li ser hev çekdarên êlên bedewî yên girêdayî hikumeta veguhêz a Sûriyê li Siwêdayê êrişî durziyan dikin.
Şervanên Durzî li ber xwe dan û nehiştin ew yek gav sînorên xwe derbas bikin.
Di vê şerî de, 89 kes ji her du aliyan hatin kuştin.
Îsraîlê jî piştgiriya Durziyan kir û êrişî çend tankên hikumeta veguhêz a Sûriyê kir.
Dîsa çav li Başûrê Sûriyê ne û Siwêda dibe navenda şerekî mezin.
89 kes heta kêliya amadekirina nûçeyê hatine kuştin, di nav wan de, çekdarên girêdayî Hikûmeta Sûriyê ya Veguhêz jî hene.
Çapemeniya Fermî dibêje ku ev şer di navbera Êlên El-Bedû û çekdarên xwecihî yên Siwêdayê de derektiye.
Lê belê, li ser erdê jî, Hêzên Hikûmeta Sûriyê ya Veguhêz destekeke leşkerî ya mezin dişîne wê deverê.
Bi gotina wê, ew hewl dide aramiyê bisepîne.
Lê belê, wer xuyaye ku hikûmet piştgiriyê dide komên El-Bedû û çekên giran jî radestî wan kirine.
Li ser rûyê erdê jî rêya Şam û Siwêdayê hatiye girtin û şer bi dijwarî berdewam e.
Ji ber rewşa ewlehiyê ya xirab, Rêveberiya Perwerdeyê ya Siwêdayê ezmûnên amadehî heya demeke nediyar rawestsndin.
Li cihên şer jî bi sedan ji welatiyan ji malên xwe derketin û ber bi cihekê ewle ve bi rê ketin.
Li Siwêdayê Îsraîlê êrişî tankên Hikumeta Veguhêz a Sûriyê kir
Hevdemî gûrbûna şer, çavê civaka herêmî û navneteweyî çû ser Israîlê.
Bêyî destwerdaneke bejayî bike, Artêşa Israîlê karwanekî leşkerî yê berî dida Siwêdayî bombe kir.
Berdevê Artêşa Israîlê Avichay Adraee eşkere kir ku wan li gundê Semî’i yê Siwêdayê êrişî çend tankên hikumeta veguhêz a Sûriyê kirin.
Berî niha jî Israîlê hişyarî dabû ku eger çi ziyan li durziyan bibe, wê bêdeng nemîne û destwerdanê bike.
Lê belê, hevdemî vî şerî, agahî belav dibin ku hevdîtin di navbera Şam û Til Evîvê de çêbûne û nayê zanîn dê çi bandorê li vê rewşê bike.
