Rûsya dixwaze S-400 ên ku firotibû Tirkiyê paşve bigire, lê hûrguliyên daxwazê hêj ne zelal in.
Li gorî îdiayên ku ji çavkaniyên parastinê hatine wergirtin, Rûsya dixwaze pergala parastina hewayî ya S-400 ku di sala 2017’an de bi 2.5 milyar dolarî firotibû Tirkiyê, paşve bigire, lê hêj ne diyar e ku ev daxwaz bi kîjan şertan an bi kîjan buhayê hatiye rojevê.
Peymana S-400’an di navbera Tirkiye û Rûsyayê de di sala 2017’an de hatibû îmzekirin, ku ji çar bataryayan pêk dihat û radestkirin di sala 2019’an de qediyabû.
Di wê demê de ev kirîn di nav NATO’yê de bû sedema nîqaşan, bû sedema nerazîbûna Amerîkayê.
Tirkiye ji bernameya F-35’an hat derxistin û cezayên CAATSA hatin rojevê.
Tê zanîn ku hin bataryayên S-400’an li Tirkiyê ne çalak in.
Ji aliyê Rûsyayê ve, paşvegirtina S-400 ên ku li Tirkiyê ne, wekî fersendek ji bo girtina valahiya parastinê li eniyê hate nirxandin.
Ji aliyê Tirkiyeyê ve jî, ev rewş wekî amûrek danûstandinê ji bo vegerandina bernameya F-35’an hate dîtin.
Lê belê, helwesta Amerîka û NATO’yê, digel hevsengiyên navneteweyî û lêçûnên siyasî, tevliheviya vê pêvajoyê zêde dike.
