Li Urdinê yekemîn qurbana vîrûsa coronayê li gorî rêkarên nû ên wezareta tenduristiyê tê binaxkirin. Li aliyekî din jî Trum dibêje, welatî wî dê 100 hezar amûrên bêhinkişandinê di nava 100 rojî de çêke û Macron jî bang li Ewrûpayê dike ku hevkariya xwe li dijî vîrûsa coronayê zêde bike.
Endamê komîteya êşên berbelav a Urdinê Besam Hicazî ragihand ku, cenazeya jina Urdinî, ku yekemîn qurbanên corona li Urdinê ye, wê li gor qanûna giştî ya binaxkirina miriyan pêk were.
Rojnameya El-Xed a Urdinî li ser zimanê Hicazî diyar kir ku, cenazeya jina 83 salî wê di bin çavdêriya Tenduristiya Giştî ji şiştin, kefenkirin û binaxkirina li goristanê, bi awayekî ku ti metirsiyê li ser kesên ku bi van karan rabin çêneke û li gorî qanûna tenduristiyê ya Urdinê ya jimar 47 a sala 2008’an, pêk were.
Berya niha, wezîrê tenduristiyê Se’ad Cabir ragihandibû ku, jina bi coronayê miriyê, pirsgirêkên wê yên tenduristî hebûn.
Cabir duh Înê ragihandibû ku, 23 kesên din bi coronayê ketine û jimara nexweşên vîrûsê li Urdinê gihiştiyee 235 kesan.
Trump: Em ê 100 hezar amûrên bêhinkişandinê hilberînin
Serokê Amerîkayê Donald Trump ragihand ku welatî wî dê 100 hezar amûrên bêhinkişandinê di nava 100 rojên bê de hilbirîne.
Ev yek di demekê de tê ku jimara nexweşên corona li Amerîka 100 hezar derbas kiriye.
Trump got:
Dibe ku pêdiviya Amerîka bi vê jimara mezin a amûrên bêhinkişandinê tunebe, ji lew re em ê destê alîkariyê ji welatên din re dirêj bikin.
Macron: Em amade ne alîkariya Îtaliya bikin
Serokê Fransayê Imanoel Macron diyar kir ku welatê wî amade ye alîkariya Îtaliya li dijî vîrûsa coronayê bike.
Macron ji rojnameyên La-Ripublica, Korêr Dîla Sîra û Lastampa re axivî û got:
Gelek gotin derbarê alîkariyên ji Çîn û Rûsyayê hene, lê tu kes nabêje ku Fransa û Almanya 2 milyon devpoşk û bi deh hezaran yelek pêşkêşî Îtaliya kirine.
Macron bang li welatên Ewrûpayê kir ku hevkariya xwe ji bo alîkariya welatên, ku di bin qamçiyê corona de mane, bikin û wiha got:
Eger em alîkariya hevkarên xwe yên Ewrûpî nekin, dibe ku welatên mîn Îtaliy û Spaniya bêjin; hûn li kûderê bûn dema dema em li eniyê bûn.
Tê zanîn, ji bo rûbirûbûna coronayê, Rûsya 15 balafir û derdora 100 pisporên leşkerî, her wiha Çînê jî balafireke bi devpoşk û amûrên bêhinkişandinê, şandibûn Îtalyayê.
